Элбэх оҕолоох ыаллар түмэллэргэ ханнык баҕарар күҥҥэ босхо сылдьыахтара

Арассыыйаҕа олорор элбэх оҕолоох дьиэ кэргэттэр аны Арассыыйа үрдүнэн баар түмэллэргэ, пааркаларга, быыстапкаларга ханнык баҕарар күҥҥэ босхо сылдьыахтарын сөп. Бу туһунан бырабыыталыстыба мунньаҕын кэмигэр бэрэссэдээтэл Михаил Мишустин иһитиннэрдэ. 

Кини эппитинэн, сорох култуура тэрилтэлэрэ босхо сылдьарга анаан туспа кыраапык оҥороллор. Холобур, ыйга икки оннук күнү олохтууллар. Онон элбэх оҕолоох төрөппүттэр баҕарбыт күннэригэр киирэр, сылдьар кыахтара суох.

— Бырабыыталыстыба федеральнай судаарыстыбаннай уорганнар көрүүлэригэр баар тэрилтэлэргэ быраабыла олохтоото. Онон мантан ыла элбэх оҕолоох дьиэ кэргэттэр култуура тэрилтэтэ үлэлиир  кэмигэр, ханнык баҕарар бириэмэҕэ босхо  киирэр, көрөр кыахтаналлар. Бу туһунан информация култуура тэрилтэтин саайтыгар көстөр сиргэ туруохтаах уонна саҥардыллан иһиэхтээх, —  диэн премьер эттэ.

Элбэх оҕолоох дьиэ кэргэттэргэ ханнык баҕарар эрэгийиэҥҥэ баар түмэллэргэ, быыстапкаларга, пааркаларга босхо сылдьар кыах 2024 сыллаахха бэрэсидьиэн ыйааҕынан бэриллибитэ. Ол чэрчитинэн, элбэх оҕолоох дьиэ кэргэн дастабырыанньатын көрдөрдөхтөрүнэ, босхо сылдьаллар диэн Объясняем.рф суруйар.

Холобур, Саха сириттэн 4-5 оҕолоох ыал соҕуруу, киин куораттарга баран, оҕолорун култуурунай сынньалаҥнарын тэрийэргэ, сайыннарарга аатырбыт түмэллэргэ, сынньалаҥ пааркаларыгар сылдьарга маннык кыаҕы туһанан, дьиэ кэргэн бүддьүөтүн улаханнык кэмчилиир кыахтаналлар. Бу манна чааһынай уонна судаарыстыбаннай диэн араарыахтарын наада.