Элбэх оҕолоох ыалларга 14 тыһыынча сир учаастага бэрилиннэ

Алтынньы туругунан, өрөспүүбүлүкэҕэ элбэх оҕолоох ыалларга уопсайа 1790 га иэннээх 14 453 сир учаастага бэриллибит, ол иһигэр быйыл —  уопсайа 134 гектар иэннээх 1456 учаастак. Бу туһунан «Бырабыыталыстыбаны кытта кэпсэтии» араадьыйа биэриитигэр өрөспүүбүлүкэ баайга-дуолга уонна сир сыһыаннаһыыларыгар миниистирэ Павел Багынанов быһа эпииргэ иһитиннэрдэ.

«Олохтоох бэйэни салайыныы уорганнара иһитиннэрбиттэринэн, босхо сир учаастагар сайаапка биэрбит үс уонна онтон элбэх оҕолоох төрөппүттэр уопсай ахсааннара 34 043 киһиэхэ тэҥнэһэр. Олохтоох дьаһалта быһаарыытынан, 14 453 сир учаастага бэриллибит. «Дьиэ кэргэн» ийэ хапытаалын бырагырааматын туһатыгар сир учаастагыттан аккаастаммыт ыал ахсаана 681, оттон 300 000 солк. суумалаах биир төгүллээх харчыны 4885 ыал  ылбыт. Билигин өрөспүүбүлүкэҕэ элбэх оҕолоох 14 051 ыал сир учаастагын ылар уочараттарын күүтэллэр», — диэн бэлиэтээтэ Павел Багынанов.

Миниистир СӨ Бырабыыталыстыбатын уурааҕынан бигэргэтиллибит Уһук Илин демографическай бэлиитикэтин концепциятын 2025 сылга диэри олоххо киллэрии  былааныгар сөп түбэһиннэрэн, элбэх оҕолоох ыалларга сыл аайы 400 сир учаастагын биэрии былааннаммытын туһунан иһитиннэрдэ.

Бу үлэ билигин Арассыыйа бэрэсидьиэнэ Владимир Путин көҕүлээһининэн ыытыллыбыт «Дьиэ кэргэн» национальнай бырайыак чэрчитинэн уонна Ил Дархан Айсен Николаев туруорбут сыалларынан-соруктарынан ыытыллар.

Сиһилии: https://www.sakha.gov.ru/news/14730