Саха сиригэр элбэх оҕолоох дьиэ кэргэттэртэн 395 устудьуон үөрэҕэр өйөбүлү ылбытын туһунан СӨ үлэҕэ уонна социальнай сайдыыга миниистирэ Елена Волкова «Якутия24» ханаалга “Актуальное интервью” биэриигэ иһитиннэрдэ.
Маннык өйөбүл былырыыҥҥыттан оҥоһуллар. Ол эбэтэр орто үөрэх тэрилтэлэригэр силиэсэр, электромонтёр, сыбаарсык, өрөмүөннээччи, машинист, асчыт, кондитер, ювелир, мэдиссиинэ сиэстэрэтэ уо.д.а. идэлэргэ харчы төлөөн үөрэнэр устудьуоннарга үбүнэн көмөлөһөллөр.
Елена Волкова өрөспүүбүлүкэ баһылыга Айсен Николаев былырыын балаҕан ыйын 1 күнүттэн элбэх оҕолоох дьиэ кэргэни социальнай өйөөһүҥҥэ эбии кэккэ дьаһаллары киллэрбитин санатта. Ыйаах сүрүн соругунан элбэх оҕолоох дьиэ кэргэн статуһун үрдэтии буолар.
«Биллэн турар, Ил Дархан ыйааҕа элбэх оҕолоох дьиэ кэргэн бүддьүөтүн өйүүргэ туһуланар. Холобур, быйыл дьиэ-уот уонна коммунальнай өҥө төлөбүрүгэр 30 бырыһыаннаах чэпчэтиинэн 8 тыһыынча курдук ыал туһанна”, — диэтэ Елена Волкова.
Ону таһынан үөрэнээччилэр оптуобуска босхо айаннара, өрөспүүбүлүкэ уопсай үөрэхтээһинин уонна профессиональнай үөрэхтээһин тэрилтэлэригэр үөрэнэр, элбэх оҕолоох ыал оҕолоро босхо аһыыллара биллэр өйөбүлүнэн буолар.
2023 сылтан өрөспүүбүлүкэҕэ үс эбэтэр онтон элбэх оҕолоох ыалга сир учаастагын биэрии оннугар биир кэмнээх харчынан төлөбүр бэриллэр. Ол курдук, 5 тыһыынчаттан тахса киһи бу өйөбүлүнэн туһанна.
«Өрөспүүбүлүкэ баһылыгын быһаарыытынан, бу төлөбүр кээмэйэ 2025 сыл тохсунньу 1 күнүттэн 200 тыһыынчаттан 300 тыһыынчаҕа тиийэ үрдээбитэ. Ону таһынан үбү туһаныы хайысхалара элбээн биэрбиттэрэ”, — диэтэ Елена Волкова.
Бырагыраама олоххо толору кээмэйинэн киллэриллибитинэн, бу сылга сайаапкалары ылыы түмүктэннэ. Бу механизмы туһаныан баҕалаах элбэх оҕолоох дьиэ кэргэттэр сайабылыанньаны эһиил биэриэхтэрин сөп.
Миниистир Саха сиригэр үөрэх ураты тэрилтэтин – инбэлииттэри мэдиссиинискэй-социальнай реабилитациялааһын өрөспүүбүлүкэтээҕи техникумун үлэтигэр болҕомтотун уурда.
«Техникум үөрэх анал тэрилтэтэ эрэ буолбатах, ону таһынан биир кэлим мэдиссиинискэй-социальнай реабилитацияны оҥороро улахан суолталаах”, — диэн кини бэлиэтээн эттэ.
Техникум быйыл доруобуйаларынан хааччахтаах дьону үлэни хааччыйыы көрдөрүүлэринэн дойду анал тэрилтэлэрин ортолоругар бастакы миэстэни ылбыта. Үөрэххэ ылар хампаанньа түмүктэринэн, 9 идэҕэ 86 устудьуон үөрэххэ ылылынна. Билигин «Тиэхиньиичэскэй өйөбүл оператора», «Социальнай үлэ» уонна «Документационное обеспечение управления и архивоведение» идэлэргэ үөрэххэ эбии сүүмэрдээһин буола турар.
Елена Волкова “Российская организация высокой социальной эффективности” Бүтүн Арассыыйатааҕы куонкурус эрэгийиэннээҕи түһүмэҕин түмүгэ тахсыбытын туһунан эттэ. Барыта 30 сайаапка киирдэ, эрэгийиэннээҕи түһүмэх чэрчитинэн, 9 номинацияҕа кыайыылаахтар билиннилэр.
“Арассыыйа бэрэсидьиэнэ Владимир Путин хаста даҕаны тоһоҕолоон бэлиэтээбитинэн, бигэ тирэхтээх дьиэ кэргэн – күүстээх Арассыыйа төрүтэ. Быйылгыттан ыла Арассыыйа дьиэ кэргэнэ көрсөр сытыы уонна дььһун суолталаах соруктарын быһаарарга аналлаах “Дьиэ кэргэн” национальнай бырайыак саҕаланна. Национальнай бырайыак дьиэ кэргэни үбүнэн өйөөһүнү эрэ буолбакка, дьиэ кэргэн сынньанар усулуобуйатын оҥоруу, дьахтар доруобуйатын харыстааһын боппуруостарын таарыйар”, — диэтэ Елена Волкова.
СӨ Ил Дарханын уонна бырабыыталыстыбатын пресс-сулууспата.
Ханнык баҕарар оскуола оҕотун ахсаанынан буолбакка, бу үөрэх кыһатын дорҕоонноохтук ааттатар үөрэнээччилэринэн аатырар. Майа орто…
Элбэх оҕолоох Сиипсэптэр диэн ыал хотун ийэлэрэ Сардаана Аркадьевна түүн үчүгэйдик утуйбакка, уутун хаммакка, төбөтө…
Саха сирин булчуттара тайаҕы бултааһын тиэмэтин туһунан өрүү сэргииллэр. Онон бу боппуруоска санаабын үллэстиэхпин баҕарабын. …
Орто дойдуга олох баарын тухары үрүҥ, хара алтыһыытын курдук эйэлээх олох элэккэй тыынын өһөгөйдөөх күүс…
Олунньу 7-8 күннэригэр Хаҥалас улууһун Иккис Малдьаҕар нэһилиэгэр Улахан Ааҥҥа Бөртө Оһуокайа ыытылынна. Хаҥалас улууһун…
Литература, тыл кэскилин кэҥэтэр соруктаах үлэҕэ оҕо литературатын айыы, сайыннарыы улахан суолталаах. Үрдүк хаачыстыбалаах оҕо…