Элбэх оҕолоохторго социальнай өйөбүл кэҥиир

Саха сиригэр элбэх оҕолоох ыалларга 2024 сылтан үлэлээбит уонна балаҕан ыйын 1 күнүттэн олоххо киирэр социальнай өйөбүл саҥа эбии миэрэлэрэ. Карточкалары Үлэ министиэристибэтин пресс-сулууспата бэлэмнээтэ.

Ил Дархан Айсен Николаев 2024 с.муус устар 26 күнүнээҕи 300№-дээх «СӨ элбэх оҕолоох дьиэ кэргэттэргэ эбии социальнай өйөбүллэрин туһунан» Ыйааҕынан балаҕан ыйыттан саҥа эбии  саҥа социальнай өйөбүллэр олоххо киириэхтэрэ:

1. Үс уонна онтон элбэх оҕоломмут, Саха сиригэр 5 сыл олорбут, дьиэ кэргэттэргэ өрөспүүбүлүкэтээҕи «Дьиэ кэргэн» ийэ хапытаала 300 тыһ. солк. диэри улаатта;
2. Өрөспүүбүлүкэтээҕи «Дьиэ кэргэн» ийэ хапытаалын сорох харчытын оҕо тииһин оҥотторууга, ортодонт өҥөтүн  уонна бырайыас төлөбүрүн толуйуохха сөп.
3. Өрөспүүбүлүкэтээҕи «Дьиэ кэргэн» ийэ хапытаалын дьиэ туттарга сир учаастагын атыылаһыахха сөп;
4. Саха сиригэр ирдэнэр уонна наадалаах идэлэргэ үөрэнэр элбэх оҕолоох дьиэ кэргэн устудьуоннарын орто анал үөрэхтэрин төлөбүрүгэр биир кэмнээх 50 тыһ. солк. ананар;
5. Сайыбылыанньа быһыытынан элбэх оҕолоох дьиэ кэргэттэргэ 12 ый устата ОДьКХ төлөбүрүгэр 30% чэпчэтии көрүллэр. Харчынан төлөбүр ый ахсын «Карта жителя Якутии» каартаҕа түһэр.
6. Элбэх оҕолоох дьиэ кэргэттэр оҕолорун оскуолаҕа уонна орто анал үөрэх кыһаларыгар босхо аһатыы көрүллэр;
7. Элбэх оҕолоох дьиэ кэргэттэр оҕолоро уопсастыбаннай тырааныспарга босхо сылдьаллар;
8. Элбэх оҕолоох дьиэ кэргэттэр төрөппүттэрэ орто анал үөрэх кыһатыгар үөрэх төлөбүрүн толуйуохтарын сөп;
9. Судаарыстыбаннай уонна муниципальнай култуура тэрилтэлэригэр элбэх оҕолоох дьиэ кэргэттэр босхо сылдьаллар.