ЫЙЫТ-ХОРУЙДУУБУТ: Өлбүт киһи кыбартыыратыгар ким олорор бырааптааҕый?

Кыбартыыра бас билээччитэ өлбүтүнэн нэһилиэстибэни ылыахха диэри онно регистрациялаах олохтоохтор, аймахтар уонна нэһилиэнньиктэр олорор бырааптара тохтообот.

Бу туһунан ТАСС-ка Судаарыстыбаннай Думаҕа Тутууга уонна олох-дьаһах хаһаайыстыбатыгар кэмитиэтин бэрэссэдээтэлин бастакы солбуйааччыта Владимир Кошелев, нэһилиэстибэни оҥоруох иннинэ дьиэнэн-уотунан дьаһаныыга үөскүүр балаһыанньалары салайыы боппуруостарыгар хоруйдууругар иһитиннэрдэ.

Кошелев өлбүт киһи бас билэр кыбартыырата нэһилиэнньиктэр икки ардыларыгар мөккүөр таҕыстаҕына бэчээттэниэ суохтааҕын уонна нэһилиэстибэни оҥоруу дьайыыта түмүктэниэр диэри онно олорор быраап сорох категориялаах дьоҥҥо оннунан хааларын бэлиэтээтэ. Дьокутаат быһаарбытынан, бу категорияларга кыбартыыраҕа регистрациялаах олохтоохтор киирэллэр, кинилэр регистрациялара суут быһаарыытынан эбэтэр бэйэлэрин сайабылыанньаларынан сотуллуор диэри күүһүн сүтэрбэт.

Ону таһынан дьокутаат салайар хампаанньа эбэтэр нэһилиэнньиктэр үүрэн таһаарар бырааптара суоҕун эттэ. Кошелев этэринэн, олорор быраап сокуонунан эбэтэр кэриэс тылынан нэһилиэнньиктэргэ, кинилэр нэһилиэстибэҕэ өссө официальнайдык киирэ илик да буоллахтарына, эмиэ көрүллэр.