Өлөөн эбэҥки национальнай оройуонун баһылыгын быыбарыгар Иван Саввинов кыайда

Өлөөн оройуонугар куоластааһын түмүктэнэр кэмигэр быыбардааччылар испииһэктэригэр киирбит дьон 65,25 бырыһыанын ылла. Быыбардыыр бүлүтүөҥҥэ түөрт хандьыдаат киирбитэ. Бу туһунан СӨ Киин быыбардыыр хамыыһыйата иһитиннэрэр.

Саввинов Иван Александрович, 1963 с. төрүөх, биэнсийэлээх, бэйэтэ туруоруммут хандьыдаат. Кини быыбардааччылар 45,47 бырыһыан куоластарын ылан кыайыы өрөгөйүн биллэ.

Александров Владислав Парфеньевич, 1953 с. төрүөх, СӨ Биологическай ресурсаларын, ураты харыстанар айылҕа территорияларын уонна айылҕа пааркаларын дириэксийэтин Өлөөн оройуонунааҕы айылҕа харыстабылын ыстаарсай судаарыстыбаннай иниспиэктэрэ, бэйэтэ туруоруммут хандьыдаат. Кини быыбардааччылар куоластарын 1,46 бырыһыанын ылбыт.

Васильев Христофор Павлович, 1987 с. төрүөх, Х.А. Христофоров аатынан Харыйалаах орто оскуолатын дириэктэрэ, «Биир ньыгыл Арассыыйа» баартыйаттан турбут. Киниэхэ быыбардааччылар 39,7 бырыһыан куоластаатылар.

Николаев Никан Николаевич, 1984 с. төрүөх, Өлөөн эбэҥки национальнай оройуонун «Өлөөн-торг» МУП дириэктэрэ, бэйэтэ туруоруммут хандьыдаат. Кини быыбардааччылар куоластарын 12,99 бырыһыанын ылбыт.

Быыбардыыр сокуону кэһии туһунан үҥсүүлэр уонна этиилэр бэлиэтэммэтэхтэр. Быыбардыыр учаастактарга хандьыдааттар, бэлитиичэскэй баартыйалар, СӨ Уопсастыбаннай балаататын кэтээччилэрэ үлэлээтилэр.