Өлөөн “Хатикота” хаһаайынын кэтэһэр

Өлөөн улууһун дьаһалтатын дьиэтигэр икки сыл устата эрэллээх ыт хаһаайынын кэтэһэн сытар. Бу – улуус баһылыга Александр Иванов Доҕор диэн ааттаах ыта. Баһылык 2020 сыллаахха таба ыстаадатыгар бара сылдьан, сүрэҕэ тохтоон, суох буолбута.

Бу туһунан Өлөөн улууһун дьаһалтатын дьыалаларын салайааччы Василиса Спиридонова кэпсээтэ. “Доҕор хаһаайынын кэбиниэтин ааныгар кэлэн сытар, утуйар, кэмиттэн кэмигэр кэлбитэ буолуо диэн бэрэбиэркэлиир, кэтэһэр, сороҕор киһи курдук ыараханнык үөһэ тыынар. Бу бэриниилээх буолуу холобура киһи дууһатын таарыйар”, — диэн кини суруйар.

Александр Степановиһы биир дойдулаахтара олус ытыктыыллар этэ. Кэнники быыбарга быыбардааччылар 95 бырыһыаннара киниэхэ куоластаабыттара.

Олохтоохтор Доҕору Хатико диэн ааттыыллар. “Хатико” – Японияҕа буолбут түбэлтэни кэпсиир киинэ, Голливуд сулуһа Ричард Гир уһуллубута. Бу дьиҥнээх олоххо буолбут түбэлтэ. Хатико диэн ыт хаһаайына өлбүтүн кэннэ, үлэтиттэн кэлэрин кэтэһэн, тимир суол ыстаансыйатыгар хас да сылы быһа күүппүтэ. Хатико өлбүтүн кэннэ, бэриниилээх буолуу бэлиэтэ диэн, дьоппуоннар өйдөбүнньүк туруорбуттара.