Өлөөн оройуонун урбаанньыттара байыаннай дьайыы кыттыылаахтарыгар гуманитарнай көмөнү тиэртилэр

“Мин биисинэһим” киин байыаннай дьайыыга кыттар биир дойдулаахтарыгар гуманитарнай көмөнү оҥорорго Өлөөн оройуонун урбаанньыттарын үбү хомуйууларын тэрийбит. Тустаах  көмөнү бу  күннэргэ байыаннай дьайыы барар сиригэр тиэрдибиттэрин туһунан киин пресс-сулууспата суруйда.

Аахсыйаны биисинэс-түмсүү ортотугар Өлөөн оройуонун “Мин биисинэһим” киинин бэрэстэбиитэлэ Аида Гоголева тэрийдэ. Манна 21 урбаанньыт уонна “Дьоҕус урбааны өйүүр пуонда” кэмиэрчэскэйэ суох тэрилтэ бэрэстэбиитэллэрэ кытыннылар. Суукка устата хомуллубут 200 тыһыынча солкуобайынан байыаннай дьайыы соруктарын толорууга тэриллэри атыыластылар.

“Хайаан да кыайыахпыт! Өлөөн оройуонун “Мин биисинэһим” киинин бэрэстэбиитэлин холобура сөхтөрдө, кини хайдах курдук суукка иһигэр итиччэ сууманы хомуйбута. Бу үтүө холобуру атыттарга кэпсиибин”, — диэн байыаннай дьайыы сиригэр-уотугар оройуон бэрэстэбиитэлэ, волонтер Антон Волошинов.