Өлөөн улууһугар өрүс үрдүнэн кыһыҥҥы суол аһылынна

Саха сиригэр Өлөөн улууһугар Өлөөн өрүһү туоруур иккис муус суола аһылынна. Бу туһунан сэтинньи 6 күнүгэр  ЫБММ эрэгийиэннээҕи управлениетын пресс-сулууспата иһитиннэрдэ.

«Өлөөн – Харыйалаах» хайысханан муниципальнай суолталаах муус суолунан тырааныспар айана көҥүллэннэ. Муус халыҥа 3 туоннаҕа диэри ыйааһыннаах массыыналар сылдьалларыгар сөптөөх.

Санатан эттэххэ, өрөспүүбүлүкэҕэ бастакы муус суол бу иннинэ Эдьигээн улууһугар аһыллыбыта.

ЫБММ санатарынан, быраабыланы тутуһуу — эһиги куттала суох буолуугут төрдө. Көҥүлэ суох мууска тахсыы иһин Саха Өрөспүүбүлүкэтин Административнай кэһиилэр тустарынан кодексатын 9.10 ыстатыйатынан ыстыраап көрүллэр:

• гражданнарга — 3-тэн 5 тыһыынча солкуобайга диэри;
• дуоһунастаах сирэйдэргэ — 20-тэн 50 тыһыынча солкуобайга диэри;
• юридическай сирэйдэргэ — 100 тыһыынчаттан 1 мөлүйүөн солкуобайга диэри.