Өлөөн улууһугар саахалланар туруктаах дьиэттэн көһөр дьоҥҥо анаан биэс дьиэ тутуллар

2025 сыл бүтүөр диэри улууска 300-тэн тахса ыалы көһөрүү былааннанар.

Өлөөн улууһугар өрөспүүбүлүкэтээҕи аадырыстаах бырагыраама чэрчитинэн, саахалланар туруктаах дьиэттэн көһөрүллүбүт дьоҥҥо элбэх кыбартыыралаах биэс дьиэ тутулла турар. Үлэ хайдах бара турарын бырабыыталыстыба отчуотун кэмигэр тутуу миниистирэ Виктор Романов бэрэбиэркэлээтэ диэн Ил Дархан уонна бырабыыталыстыба пресс-сулууспата иһитиннэрэр.

Харыйалаах сэлиэнньэтигэр икки этээстээх икки дьиэ тутулла турар, 24 кыбартыыралаах. Генеральнай бэдэрээтчитинэн «СПК Техстрой» ХЭТ буолар. Бастакы дьиэ 70% бэлэм, иккис дьиэ — 40%. Тутуу 2025 сыл иккис кыбаарталыгар түмүктэнэрэ былааннанар. Миниистир кыраапыктан хаалыы баарын бэлиэтээтэ уонна бэдэрээтчиккэ үлэ тэтимин түргэтэтэргэ сорудахтаата.

Өлөөн сэлиэнньэтигэр үс этээстээх 30 кыбартыыралаах олорор дьиэ тутуута түмүктэнэн, дьон киирэригэр бэлэмнэнэр. Маннык иккис эбийиэк тутуута салҕанан бара турар, быйылгы сыл иккис кыбаарталыгар үлэҕэ киллэрии былааннанар. Генеральный бэдэрээтчит — “Конкритстрой” ХЭТ.

Маны таһынан Дьиилиҥдэ сэлиэнньэтин Новай уулуссатыгар олорор дьиэ комплекса тутуллар. Дьиэлэр 16 кыбартыыралаах буолуохтара, бэдэрээтчит – «НордМост» ХЭТ. Билигин тутуу матырыйаалларын тиэрдэ сылдьаллар.

Өлөөн улууһугар 2020 сылтан уопсайа 744 дьиэ кэргэн 301 саахалланар туруктаах дьиэттэн көһөрүллүбүт. 2025 сыл бүтүөр диэри өссө 300-тэн тахса ыалы көһөрүү былааннанар.