Өлөөн уонна Харыйалаах сэлиэнньэлэрин икки ардыгар айан-сырыы көҥүллэннэ

Өлөөн улууһугар өрүһү туоруур суолу Өлөөн уонна Харыйалаах сэлиэнньэлэрин икки ардыгар астылар.
Муус халыҥа 3 туоннаттан элбэҕэ суох ыйааһыннаах массыыналары уйар кыахтаах.

«Өрөспүүбүлүкэҕэ 46 мууһунан сылдьар суол баар. Күн бүгүн Эдьигээҥҥэ уонна Өлөөҥҥө икки суол официальнайдык аһылынна. ГИМС иниспиэктэрдэрэ хамыыһыйа састаабыгар киирэн, мууска көҥүллэммэтэх сиринэн киирбэттэрин курдук рейдэлэри ыыталлар. Санатан эттэххэ, көҥүллэммит сиринэн эрэ мууһунан туоруохтааххыт уонна информационнай бэлиэлэри барытын тутуһуохтааххыт», — диэн эттэ РФ ЫБММ ГИМС Саха сиринээҕи Киинин начаалынньыга Александр Жаворонков.

РФ ЫБММ санатар: көҥүллэммэт сиринэн мууска таҕыстахха, СӨ КоАП 9.10 ыстатыйатынан ыстарааптаах административнай эппиэккэ тардыллаҕын:
Гражданнарга — 3-тэн 5-кэ диэри тыһ. солк;
Дуоһунастаах дьоҥҥо — 20-тэн 50 тыһ. солк. тиийэ;
Юридическай сирэйдэргэ — 100-тэн 1 мөл. солк. диэри, диэн суруйар @mchsYakutia телеграм-ханаал.