Өлөөн үөрэнээччилэрэ устуоруйаны кэрэхсииллэр

Өлөөн сэлиэнньэтин орто оскуолата (дириэктэр А.П.Васильев) олус айымньылаахтык үлэлиир. Онно дьиэтэ-уота да тупсаҕайа төһүү буолар.

Үрдүкү кылаас үөрэнээччилэригэр үөрэх, олох туһунан уруоктар олус наадалаахтар. Ол курдук, кинилэргэ быйыл биир бэртээхэй уруокка сылдьан турабын. СӨ Култуура уонна устуоруйа нэһилиэстибэтин эбийиэктэрин харыстааһын департаменын салайааччыта Николай Макаров бу оскуолаҕа сэргэх уруогу ыыппыта. “Хайа да оройуоҥҥа сырыттахпына кырдьаҕастары кытта кэпсэтэн, бу улуус устуоруйатын иҥэринэбин, оттон оскуола оҕолорун кытта кэпсэттэхпинэ, улуус инники кэскилэ хайдах буолуоҕун билэбин”, — диэбитэ онно. Департамент салайааччыта оҕолорго оскуолаҕа хайдах үөрэнэн, үрдүк үөрэххэ туттарсыбытын, туох ыарахаттар баалларын, устудьуоннаабыт сылларын туһунан кэпсээбитин үөрэнээччилэр олус сэргээн истибиттэрэ.

“Ханнык идэни баһылыаххытын баҕараҕыт, таллыгыт дуо?”, — диэн ыйытыытыгар оҕолор илиилэрэ күөрэс гына түстэ.

Оҕолорго Саха сирин устуоруйатын слайдаларынан кэпсээбитин  кэрэхсээтилэр. Өлөөн сэлиэнньэтин үөрэнээччилэрэ устуоруйаны да интэриэһиргииллэрэ көһүннэ.

Салгыы оскуола таһыгар тахсан,  САССР норуотун хаһаайыстыбатын үтүөлээх үлэһитин Николаев Христофор Матвеевич пааматынньыгар бэлиэ суругу ууруу сиэригэр кытыннылар. Онно тустаах департамент салайааччыта Николай Макаров, үөрэх управлениетын начаалынньыга Мария Иванова, оскуола дириэктэрин солбуйааччы Анна Стручкова, Өлөөн сайдыытыгар кылаатын киллэрбит Христофор Матвеевич кыыһа, улуус бастыҥ көҕүлээччитэ Марина Николаева, сиэнэ Матвей Топоров (10 кылаас) кытыннылар. Бу бэлиэ пааматынньыгы оскуола таһыгар 2013 с. туруорбуттара түбэһиэхчэ буолбатах. Христофор Матвеевич төрүт табаһыт дьон оҕото буолан, оҕо эрдэҕиттэн хоту дойду үлэтин-хамнаһын билэн улааппыта. Бу оскуола бастакы выпускниктарыттан биирдэстэрэ, олохтоох нэһилиэнньэттэн оскуолаҕа дириэктэр буолбут бастакы салайааччы. Баартыйа оройкуомугар бастакы сэкирэтээринэн, ол иннинэ оройуоннааҕы сэбиэккэ таһаарыылаахтык үлэлээн, төрөөбүт дойдутун сайдыытыгар дьоһун кылаатын киллэрбитэ. Ол да иһин, кини үтүөтүн-өҥөтүн сыаналаан, Ил Түмэн норуодунай дьокутаата Елена Голомарева уонна да атыттар көҕүлээн, туруортарбыттара.

Ити курдук, бу орто оскуола үөрэнээччилэрэ төрөөбүт дойдуларын таптыыллар, кини баай устуоруйатынан, үлэһит дьонунан киэн тутталлар. Тэрээһини дириэктэри иитэр үлэҕэ солбуйааччы Саргылана Павлова, история учуутала Зоя Михайлова иилээн-саҕалаан ыыттылар.  Маннык тэрээһиннэр өрүү да буола турдуннар.

Хаартыска: ааптар