«Өлөөнө эмээхсин» клип улаханнык долгутта (ВИДЕО)

Улуу Кыайыы 80 сылынан биһиги аймахха умнуллубат бэлиэ күн буолла. Ол курдук, хос эбээбит Өлөөнө эмээхсин туһунан «Өлөөнө эмээхсин» диэн клип бэлэх буолан барыбытын үөртэ, улаханнык долгутта.

Бу биир дойдулааҕым, суруйааччы, СӨ култууратын үтүөлээх үлэһитэ, тыыл бэтэрээнэ Иннокентий Михайлович Сосин тылыгар, Прокопий Федоров дьүрүлүгэр, Иннокентий Огочонов толоруутугар киһини долгутар клип күн сирин көрдө. Клибы таҥан, дууһатын ууран туран элбэх хит буолбут ырыалар ааптардара Прокопий Федоров оҥордо. Киниэхэ махталым муҥура суох.

Бу күннэргэ бииргэ төрөөбүт быраатым Василий Николаевич, кийиитим Матрена Михайловна Филипповтар эбээбит Өлөөнө эмээхсин барахсан уолаттара олохторун толук уурбут сирдэринэн Москва, Волгоград  куораттарынан  сырыттылар. Хорсун-хоодуот буойуттар сүүрбүт-көппүт, олорбут өтөхтөрүн буорун илдьэн, көмүс уҥуохтара көтөҕүллүбүт сирдэригэр уурдулар, сиэр-туом оҥордулар.

Эбээбит Өлөөнө барахсан тулуурун, уолаттарын күүтэрин сурукка тиспит, үйэтиппит биир дойдулааҕа Иннокентий Михайлович Сосин буолар.

Сурукка тиһиллибиттэн кылгастык билиһиннэрдэххэ, Аҕа дойду сэриитин иннинэ, хос эбээбит Өлөөнө Бэскиэ Баһылайдыын Суола Моорукка ыал буолан, үс уолу төрөтөн, сүөһү ииттэн, үлэлээн-хамнаан күөх буруоларын унаарытан дьоллоохтук олорбуттар. Уолаттарын Миитэрэйи, Борокуопайы, Ылдьааны кыраларыттан үлэҕэ сыһыаран, тэҥҥэ илдьэ сылдьан атахтарыгар туруорбуттар, үлэһит үтүөлэрэ оҥорбуттар.

Аҕа дойду уоттаах сэриитэ саҕаламмытыгар, уолаттар үһүөн сэриигэ утуу-субуу ыҥырыллан барбыттар. Кинилэр барыахтарыттан, Өлөөнө эмээхсин уола Миитэрэйтэн хаалбыт соҕотох сиэнин — уончалаах Дашаны кытта Боотур алааһын арҕаа өттүгэр баар балаҕаныгар иккиэйэх хаалбыттар. Сэрии хонуутуттан «хара суруктар» кэлитэлээн барбыттар. Уола Борокуопай суох буолбутун туһунан биллэрии кэлбит, онтон икки уолун туһунан туох да сибики биллибэтэх. Дьиҥэр, өлбүттэрин туһунан «хара суруктар» кэлбиттэр эбит, ону дьон Өлөөнөнү аһынаннар кыайан туттарбатахтар.

Эбээбит барахсан оҕолорум сүөһү гыныахтара диэн сүөһүтүн эспэккэ тутан олороохтообут. Күндү, көмүс оҕолоро күн сиригэр суох буолбуттарын сүрэҕинэн төһө да сэрэйээхтээбитин иһин, саатар биир оҕом эргиллиэ диэн кэтэһээхтиир эбит. Алааһын кытыытынан биирдэ эмэ аттаах киһи аастаҕына,  оҕолорун кэтэһэр ийэ барахсан ардахтан, хаартан, тыалтан-куустан, күн сыралҕаныттан чаҕыйбакка, тохтообокко таһырдьа тахсан өргө диэри суолу көрөн тураахтыыр буолара үһү. Уолаттарын күн аайы күүтээхтиирин, кинилэргэ ас-таҥас мунньарын, кэһиитин уурарын туһунан дьоно-сэргэтэ элбэҕи кэпсииллэрэ. Ити курдук биһиги күндү киһибит, эбээбит барахсан, уолаттарын тыыннааҕын тухары күүппүтэ…

Эбээбитинэн, үс ини-бии хорсун-хоодуот байыас уолаттарынан: Миитэрэй, Борокуопай, Ылдьаа Павловтарынан киэн туттабыт! Кинилэр сырдык ааттарыгар сүһүөхтээх бэйэбит сүгүрүйэбит, хоолдьуктаах бэйэбит хоҥкуйабыт. Сүрэхпитигэр сөҥүөрбүт күндү дьоммут олохторун ыччаттара салгыыбыт.

Елена Чичахова,

Ф.Г.Охлопков аатынан оскуола учуутала, РФ үөрэҕириитин туйгуна.

Майа, Мэҥэ Хаҥалас.