Өлөөҥҥө Александр Иванову кэриэстээтилэр

Ил Дархан Айсен Николаев үлэтинэн Өлөөн улууһугар тиийдэ. Кини өрөспүүбүлүкэ норуотун хаһаайыстыбатын үтүөлэх үлэһитэ, Өлөөн оройуонун урукку баһылыга Александр Степанович Иванов пааматынньыгар сибэкки дьөрбөтүн уурда.

«Олохтоохтор искибиэри үчүгэйдик көрөн-истэн тутуулара Александр Степановичка махталларын бэлиэтэ буоларын көрөн киһи үөрэр. Александр Степановичка ытыктабыллаах сыһыаны, кини туһунан үтүө өйдөбүлү илдьэ сылдьалларын туоһулуур. Александр Степанович туһунан сырдык өйдөбүл сүрэхпитигэр хаалыаҕа», — диэн Айсен Николаев санаатын үллэһиннэ.

Александр Иванов аатынан искибиэр 2022 сыл күһүнүгэр арыллыбыта. Манна кини мөссүөннээх скульптура оҥоһуллубута. Уҥа илиитигэр Өлөөн оройуонун символын алмаастардаах таба муоһун тутан олорор гына оҥорбуттар. Оттон хаҥас илиитэ сүрэҕэр сыстыбыт. Скульптор Афанасий Романов этэринэн, Өлөөн улууһун бары дьыалатын сүрэхпэр чугас тутабын диэн өйдөбүллээх.

Александр Иванов 2013 сыллаахха Өлөөн улууһун баһылыгынан талыллыбыта. 2018 сыллаахха иккистээн талыллыбыта. 2020  сыллаахха олохтон барбыта.