Өлөөҥҥө снегоход муус анныгар түһүүтүгэр сүппүт иккис киһини көрдүүллэр

Өлөөн оройуонугар быыһааччылар снегоход муус анныгар түһүүтүгэр сүппүт иккис киһини көрдүүллэр. Бу туһунан СӨ Быыһыыр сулууспата иһитиннэрэр.

Өрүскэ снегоход түһэн сытарын сэтинньи 3 күнүгэр булбуттара. Манан икки киһи сылгы баазатыгар айаннаан испиттэр. Биирдэрин өлүгүн сэтинньи 7 күнүгэр быһылаан буолбут сириттэн 300 м тэйиччи сиртэн өрүстэн булбуттара.

СӨ Быыһыыр сулууспатын водолазтара сэтинньи 8 күнүгэр тиийэн, 100 тыһ.кв.м. өрүс акваториятын камеранан чинчийдилэр. Ол туох да түмүгү аҕала илик. Водолазтар этэллэринэн, муус анныгар туох да көстүбэт.

Көрдүүр үлэҕэ 14 киһи сылдьар: икки водолаз уонна 12 олохтоох дьон.