Н.Колодезникова түһэриитэ
Өлөөн улууһугар тохсунньу ыйы быһа тымныы күн-дьыл турар. Ол курдук, ахсынньы ый бүтүүтэ кыһын баарын биллэрэн, тымныынан хаарыйан киирэн барбыта. Хаар аҕыйахтык түһэр, былыт күүтүүлээх ыалдьыт курдук дэҥҥэ кэлэн ааһар, төһө да тыала суох буоллар, түргэнник суураллан тымныы, чысхаан баһыйар.
Ыйбыт ортотун ааста, нэдиэлэҕэ биир, икки күн 36 — 38 кыраадыс көһүннэҕинэ халлааммыт сылыйда дэһэбит. Күн үрдүк систэн лаппа үөһэ көстөр буолан, сааспыт кэлэрэ чугаһаабыт диэн үөрэбит. Ойуур тыаҕа хаамтахха талах аайыттан мап-маҕан куруппааскылар көтөн, кынаттарынан сапсыналлар. Чугас көтөөт, хаарга уйдаран, ойуур иһигэр саһан хаалаллар.
Төһө да тымныы буоллар, доруобуйаны чэбдигирдэр хаамыынан дьарыктанааччылар хаамалларын тохтоппоттор. Бу күннэргэ ас- таҥас тиэммит кыра- улахан массыыналар, дьону таһар таксыылар кыһыҥҥы суолунан айанныыллар. Куораттан Өлөөн киинигэр диэри таксыынан балтараа суукканан кэлэллэр. Көтөр аалынан көтөргө авиа-билиэт сыаната олус үрдүк буолан, куоракка барар наадалаах дьон таксыы өҥөтүнэн туһанар буолбуттара балачча кэм буолла.
Кыһыҥҥы суолу баттаһа олох- дьаһах хомунаалынай хаһаайыстыба үлэһиттэригэр быйылгы, эһиилги оттугу тиэйтэриигэ эппиэттээх кэм. Кэлбит массыыналар Өлөөнү нөҥүөлээн Анаабыр оройуонугар тиийэ айанныыллар. Айан суола Анаабырга диэри, аара Дьэлиҥдэ нэһилиэгин таарыйан, Куонаапка эбэ иһинэн барар. Куонаапка быйыл уулаах тоҥон, сорох сирдэринэн тааҥы таһааран, сырыыга- айаҥҥа мэһэйи таһаара сыспыта. Суолу көрөр- истэр “Анаабыр алмаастара” тэрилтэ улахан тиэхиньикэлэринэн бириэмэтигэр оҥорон биэрэн суолга хаайтарыы тахсыбата. Мантан инньэ муус устар ыйга диэри Өлөөн, Анаабыр тыын боппуруостарын быһаарар сыаллаах кыһыҥҥы суолунан элбэх массыына айаннарын тиһигин быспакка кэлиэхтэрэ- барыахтара.
Надежда Колодезникова, Өлөөн.
Хаартыска: Н.Колодезникова түһэриитэ
Арассыыйаҕа сылын ахсын ыытыллар «Мисс Россия 2025» куонкуруска 90 тыһыынчаттан тахса сайаапка киирбит диэн ТАСС…
Нам улууһугар хортуоппуй уонна оҕуруот аһын үүннэриитинэн дьарыктанар бааһынай хаһаайыстыбаларга уонна производственнай кооперативтарга билигин саамай…
Саха сирин киин улуустарын олохтоохторо чаҕылхай күннээх «дьахтар сайыныгар» астына сырыттахтарына, өрөспүүбүлүкэ сорох улуустарыгар маҥнайгы…
Өймөкөөн нэһилиэгэр айылҕа иэдээнигэр түбэспит олорор дьиэлэри чөлүгэр түһэриигэ Саха сирин үгүс улуустарыттан, Дьокуускайтан, араас…
Балаҕан ыйын 15 күнүгэр киэһэ хойут Ленскэйдээҕи быыһыыр-көрдүүр этэрээт быыһааччылара ойуурга муммут киһини буллулар. Киин…
Бүгүн, балаҕан ыйын 16 күнүгэр, куорат үрдүнэн быстах кэмҥэ өрөмүөн үлэтэ буоларынан сибээстээн, күн устата…