Электроннай табаҕы тардыбыт Арассыыйа туриһа 2,5 мөл.солк. ыстарааптаныа

Буддистар храмнарын сиригэр-уотугар IQOS электроннай табаҕы тардыбытын иһин Арассыыйа туриһын Таиланҥа 99 сыл устата киллэрбэт буолуохтарын уонна 2,5 мөлүйүөн солкуобайга тиийэр ыстараапка тардыахтарын сөп. Бу туһунан Mash телеграм-ханаала иһитиннэрэр.

Кэлин биллибитинэн, Арассыыйа олохтооҕо турист бөлөҕүн кытта Wat Kanlayanamit Woramahawihan храмыгар экскурсияҕа кэлбит. Кини сылдьар кэмигэр электроннай табаҕын тардаары туора тахсыбыт, ол гынан баран, иккитэ эрэ оборбут.

«Олохтоох быраабы араҥаччылыыр үлэһиттэр кинини түргэнник  тутан ылан, учаастакка илдьибиттэр. Ааҥыл тылын билбэтиттэн уонна ыксалтан турист туох иһин тутуллубутун тута өйдөөбөтөх», — диэн Mash иһитиннэрэр.

Маннык ыар содул үөскээбитин төрүөтэ — Таиланҥа электроннай табаҕы дойдуга киллэрэргэ, атыылыырга, харайарга уонна туһанарга кытаанах бобуу дьайар. Сокуону кэспиттэргэ 10 сылга диэри хаайыы эбэтэр биир мөлүйүөн батка (2,5 мөлүйүөн солкуобай кэриҥэ) тиийэр ыстараап куттала суоһуур.