Елена Голомарева: «Аярган» эпоһынан хотугу омуктар үгэстэрин билиһиннэрдилэр

Нерюнгри куорат уонна Нерюнгри оройуонун 50 сыллаах үбүлүөйүгэр анаммыт Олоҥхо Ыһыаҕар хотугу аҕыйах ахсааннаах төрүт омуктар уус-уран айымньыларын баайын туһунан кэпсиир бырагыраама көрдөрүлүннэ.

Тэрээһини СӨ Баһылыгын уонна Бырабыыталыстыбатын дьыалаларын управлениетыгар сыһыарыллыбыт тэрилтэ тэрийэн ыытта.  Бу эрэгийиэн историятыгар уонна култууратыгар харыстабыллаах сыһыан чаҕылхай холобурунан буолла. Ил Түмэн Хотугу аҕыйах ахсааннаах төрүт омуктар боппуруостарыгар уонна Арктика дьыалаларыгар сис кэмитиэтин бэрэссэдээтэлэ Елена Голомарева маннык хабааннаах тэрээһиннэр суолталааҕын эттэ, Нерюнгри оройуонун салалтата култуурунай нэһилиэстибэни харыстыырга уонна олохтоох уратыны сайыннарарга киллэрэр кылаатын бэлиэтээтэ.

Парламентарий этэринэн, маннык көҕүлээһиннэр төрүт омуктар ураты билиилэрин уонна уопуттарын харыстыырга көмөлөһөллөр, национальнай киэн туттууну уонна үгэс буолбут сыаннастарга ытыктабылы бөҕөргөтөллөр.

«Биһиги өбүгэлэрбит эпостара уонна үһүйээннэрэ олох дириҥ ис хоһоонун уонна философиятын илдьэ сылдьаллар, сиэр-майгы сыаннастарын тиэрдэллэр уонна норуот бэйэни өйдөөһүнүн олохтууллар. Кинилэр хас биирдии этнос бэйэтигэр уратытын уонна култууратын харыстааһыҥҥа сүрүн оруолу оонньууллар», — диэн Елена Голомарева бэлиэтээтэ.

Номоххо киирбит Аярган бухатыыр историята сценарий сиһилии дьүөрэлэһиитин уонна анал астаах бэлэмнээбит «Тыгын Дархан» эрэстэрээн шеф-повардарын маастарыстыбаларын түмүгэр көрөөччүлэр харахтарын иннигэр тилиннэ.

«Бу тэрээһин норуот өйүн-санаатын уонна көлүөнэлэр ситимнэрин суолтатын көрдөрдө, хотугу төрүт омуктар духуобунай сыаннастарын сайдыытыгар биир суолталаах түһүмэҕинэн буолла уонна Нерюнгри оройуонун ураты этнокултуурунай эйгэтин салгыы үөрэтэргэ уонна сайыннарарга кэскили түстээтэ. Биһиги олохтоох нэһилиэнньэ аска-үөлгэ култууратын уонна үгэстэрин харыстыыр уонна сайыннарар сыалтан өрөспүүбүлүкэ бары улуустарыгар маннык тэрээһиннэри ыытар былааннаахпыт», — диэн «Тыгын Дархан» үлэтин салайар СӨ Баһылыгын уонна Бырабыыталыстыбатын дьыалаларын управлениетын салайааччыта, саҥа бырайыактар ааптара Иван Лазарев эттэ.

Норуот дьокутаата Елена Голомарева Хотугу уонна Арктика аҕыйах ахсааннаах омуктарын айымньыларын көхтөөхтүк өйүүргэ уонна киэҥ эйгэҕэ таһаарарга, үгэс буолбут гастрономическай култуура сайдарыгар көмөлөһөргө ыҥырда. Көҕүлээһиннэри өйөөһүн омук силистэрин-мутуктарын бөҕөргөтүүгэ туһуламмыт эрэгийиэннээҕи бэлиитикэ биир сүрүн хайысхата буолуохтааҕа  бэлиэтэннэ. Бу туһунан Ил Түмэн пресс-сулууспата суруйар.