Элгээйи олохтоохторун АДПИ тэрилэ баһаартан көмүскүө

Дьиэҕэ-уокка баһаартан сэрэхтээх буоларга Сунтаар улууһун баһылыга Анатолий Григорьев көҕүлээһининэн улуус үрдүнэн сыллата ”Предупреди пожар – установи АДПИ” аахсыйа салҕанар.

Саха сиригэр «Предотврати пожар – установи АДПИ» диэн аахсыйа 2018 сылтан саҕаламмыта. Аахсыйа көмөтүнэн элбэх оҕолоох ыалларга, бэтэрээннэргэ, инбэлииттэргэ баһаар турбутун тута биллэрэр (АДПИ) тэриллэри туруоруу күүскэ барар. 2021 сылтан саҥа дьиэлэргэ туруорар ирдэбил быһыытынан киирбитэ.

Ол чэрчитинэн Элгээйи нэһилиэгэр Элгээйитээҕи баһаарынай чаас уонна олохтоох дьаһалта үлэһиттэрэ ыалларынан сылдьан АДПИ тэрилин  туруордулар. Бу тэрил кэнники сылларга чахчы көдьүүстээҕин элбэх түгэҥҥэ көрдөрбүтэ. Буруону тута билэр уонна тыаһаан иһитиннэрэр буолан, уот туруон иннинэ умайыыны эрдэ тохтоторго олус туһалааҕа бэлиэтэнэр. Нэһилиэк баһылыга Павел Григорьев иһитиннэрбитинэн, билигин Элгээйи нэһилиэгин ыаллара бука бары уоту сэрэтэр АДПИ-ны туруорунан олороллор. Бу туһунан «Сунтаар сонуннара» хаһыат суруйар.

АДПИ – автономнай баһаары сэрэтэр тэрил кыра да буруо сытыгар улахан тыас таһааран дьону сэрэтэр. Оннооҕор түүн ортото тыаһаан дьону уһугуннаран иэдээн тахсарыттан сэрэтэр аналлаах. Хас биирдии ыал дьиэтигэр маннык тэрил баар буолуохтаах. Аахсыйа туһунан сиһилии нэһилиэнньэ олоҕор-дьаһаҕар куттала суох буолууну хааччыйар Судаарыстыбаннай кэмитиэтин саайтыгар ааҕыахха сөп.