Элгээйи түмэлигэр саҥа экспонат — бизон

Борис Андреев аатынан Элгээйитээҕи Айылҕа түмэлигэр саҥа экспонат баар буолла. Баараҕай бизон кыыл бу күннэргэ миэстэтин булла.

Бизон  — Элгээйи түмэлигэр саҥа, улахан чуучала. Бу сэдэх кыыл манна экспонат быһыытынан кэлиитигэр Элгээйи олохтооҕо Афанасий Трофимов өй уган Айылҕа түмэлин үлэһиттэрэ турунан олоххо киирдэ. 2016 сыллаахха Канадаттан Хаҥалас Буотаматыгар аҕалыллыбыт,  кырдьан  өлбүт Сүөдэр диэн бизон Айылҕа түмэлин «Туундара» хоһун баараҕай кыыла буолла.

Бизон чуучалатын түөрт ый устата таксидермист Геннадий Гуляев, көмөлөһөөччүтэ Александр Поротов айан-тутан таһаардылар.

Саҥа экспонат арыллыытыгар нэһилиэнньэҕэ «Быки холода» диэн документальнай киинэ көрдөрдүлэр. Айылҕа түмэлигэр лааҕыр оҕолорун ыҥыран сэргэхситтилэр.

Айылҕа түмэлигэр Сүөдэр бизон 1674-с чуучала буолар. Элгээйи түмэлин көрбүт эрэ барыта сөҕөр уонна махтайар.

Тускулаана ГОРОХОВА-КОБЕЛЬЯНОВА