Элгээйилэр уһулуччулаах киһилэрин олоҕун дьоһуннаахтык көрдөрдүлэр

Сэтинньи 17 күнүгэр Дьокуускайга биллиилээх кыраайы үөрэтээччи, учуутал, уопсастыбаннай диэйэтэл, Саха сиригэр бастакы Үлэ Дьоруойа Петр Хрисанфович Староватов төрөөбүтэ 150 сылыгар үөрүүлээх тэрээһин буолла.

Петр Хрисанфович олорон, үлэлээн ааспыт Бүлүү, Сунтаар улуустара, Ем.Ярославскай аатынан Хотугу сир норуоттарын устуоруйатын уонна култууратын судаарыстыбаннай холбоһуктаах мусуойа, Национальнай архыып үлэһиттэрэ, Ньурба улууһа күүстэрин түмэн, Дьокуускай куоракка үрдүк таһымнаахтык бэлиэтээтилэр. Ол курдук, кини олоҕун, үлэтин-хамнаһын сэргээччилэр Ем.Ярославскай аатынан  мусуойга анаан-минээн кэлэн, олус баай ис хоһоонноох быыстапканы астына көрдүлэр.
Национальнай бибилэтиэкэҕэ  «П.Х.Староватов. Жизнь и деятельность» кинигэ сүрэхтэннэ.
Онтон киэһэ Б.Ойуунускай аатынан Саха тыйаатырыгар Петр Староватов аатын сүгэр Элгээйи орто оскуолатын кэлэктиибэ театрализованнай дьүһүйүүнү туруорда.  Бүлүүттэн анаан-минээн кэлбит айар талааннаахтар биир дойдулаахтарын уонна куорат олохтоохторун, ыалдьыттарын махталларын ыллылар.

ххх

Дьүһүйүүнү көрбүт үгүс киһи учууталлар буолбакка, идэлээх артыыстар оонньоотулар дии санаабыттарын туһунан эттилэр уонна элгээйилэр улахан үтүөлээх киһилэрин үйэтитэргэ эдэрдиин-эмэнниин үлэ үөһүгэр сылдьалларын сөхтүлэр-махтайдылар, махталларын биллэрдилэр.
Дьүһүйүүнү биллиилээх суруналыыс, СӨ култууратын үтүөлээх үлэһитэ, суруналыыстыка салаатыгар СӨ судаарыстыбаннай бириэмийэтин лауреата, Бүлүү улууһун уонна Бүлүү куоратын бочуоттаах гражданина Николай Александрович Крылов «Человек опередивший время» кинигэтинэн туруорбуттар. Ону сэргэ Николай Якутскай «Аата алмааска» сэһэнинэн СӨ култууратын туйгуннара Людмила Павлова, Надежда Попова суруйбут сценарийдарынан быһа тардыылар көһүннүлэр.
Дьүһүйүү сценариһа — СӨ култууратын туйгуна Татьяна Семенова, режиссера -– СӨ култууратын туйгуна Эльвира Николаева.

Өрөспүүбүлүкэ уопсастыбаннаһа кыттыылаах үөрүүлээх тэрээһини саҕалаабыт дьүһүйүүнү СӨ култууратын туйгуна, Уйбаан Нуолур аатынан олохтоох бибилэтиэкэ сүрүн бибилэтиэкэрэ Татьяна Семенова бэрт холкутук, ис-киирбэхтик иилээн-саҕалаан ыытта. Петр Староватов оҕо эрдэҕинээҕитин Элгээйи орто оскуолатын 7 кылааһын үөрэнээччитэ Августин Капитонов сэргэхтик оонньоон, көрөөччү тапталын ылыан ылла. Онтон Староватовы бэйэтин Элгээйи орто оскуолатын устуоруйаҕа учуутала Вячеслав Сафонов итэҕэтиилээхтик толордо. Оруолларга казах офицерын «Оһуор» култуура киинин испэсэлииһэ Клим Петров, Баачыканы олохтоох дьаһалта баһылыгын солбуйааччы Аркадий Самойлов, вице-губернатор Скрыпицыны Сергей Ефремов, учуутал Владимир Ивановиһы — Элгээйи орто оскуолатын физкультураҕа учуутала Савва Винокуров, «Ийэ тыл ааҕар бөлөх» (Элгээйи орто оскуолатын алын сүһүөх кылааһын учууталлара) уо.д.а. оонньоотулар.

Уопсай тэрээһиҥҥэ П. Х. Староватов аатынан Элгээйи орто оскуолатын дириэктэрэ Софья Васильевна Игнатьева, Василиса Васильевна Миронова, Оксана Николаевна Кривошапкина дьаныардаахтык үлэлээтилэр.
Биир дойдулаахтара Эльвира Самуиловна бэйэтин күүстээх исписэлиис быһыытынан өссө төгүл дакаастаабытын, аҕыйах бириэмэ иһигэр биир улахан киһи олоҕун сырдатар дьүһүйүүгэ хас биирдии оруолу толорор дьонун сөпкө аттаран, уобарастарын көрөөччүгэ арыйалларын ситиспитин астына бэлиэтээтилэр.

Эльвира МАКСИМОВА, Национальнай бибилэтиэкэ үлэһитэ:
«Дьэ кырдьык, Элгээйи талааннаах дьон олорор нэҺилиэгэ буоларын өссө төгүл итэҕэйдибит: олус да үчүгэйдик оонньоотулар. Маннык улахан тиэкистэри өйтөн саҥараллар, дикциялара да оһуобай, таҥастара-саптара — ол сыллардааҕы стиль олус табыллыбыт. Уолчаан эмиэ улахан дьонтон хаалсыбакка үчүгэйдик оонньоото. Маладьыастар! Аны дьүһүйүү устатын тухары улахан экраҥҥа хаартыскалар көстөллөрө  ылыллыбыт тиэмэни ситэрэн-хоторон биэрэр, итинтэн улахан эстетическэй астыныыны ыллыбыт. Испэктээк үрдүк таһымнаахтык туруоруллубут.  Бүтүн биир хамаанда түмсэн биир санаанан оонньообута илэ-чахчы көһүннэ!