Эльмира Ханиева: «Мандар Уус кинигэтин атыылаһан, үөрэн турабын…»

Саха сиригэр ыытыллар XXV үбүлүөйдээх Сабантуйга Татарстаан Өрөспүүбүлүкэтиттэн бэрт элбэх норуот үтүө үгэһин үйэтитэр дьон,  норуот маастардара,  артыыстар, спортсменнар кэлбиттэр.

Кинилэр ортолоругар татаар омугун фольклоругар идэтийбит исписэлиис Эльмира Ханиева баар. Кини Саха сиригэр аан бастаан кэлбитин, дьонун-сэргэтин, дьикти ураты бэлиэ сирдэригэр сылдьыбытын кэпсээтэ. Фольклорист быһыытынан Эльмира Ханиева саха норуотун маастара, духуобунас академига   Борис Неустроев-Мандар Уус  дириҥ ис хоһоонноох кинигэтин атыылаһан, бэйэтин бибилэтиэкэтин хаҥаппытын үөрэн туран кэпсээтэ.

Кини ыаллыы олорор Марий Эл, Удмуртия  өрөспүүбүлүкэлэрин олохтоохторун ойууларын-бичиктэрин үөрэтэр эбит. «Аны Саха сирин орнаменнарын кытта билсэр дьоллоннум. Биир түүр омук буоллахпыт, айылҕа уруһуйа сахалар орнаменнарыгар эмиэ үгүс эбит.

Мин кэлиҥҥи сылларга бэйэм быысапкалыыр уонна иистэнэр  буоллум. Онон дьиэбэр тиийэн, саха орнаменнарын быысапкалаан көрүөм», — диэн санаатын үллэһиннэ Эльмира Ханиева.