Өлүөнэ муостата Саха сирин олохтоохторун тырааныспарынан сырыыларын түөрт төгүл улаатарын хааччыйыаҕа

Өлүөнэ муостата өрөспүүбүлүкэ илин уонна арҕаа өттүн сылы эргиччи ситимниир Саха сирин логистическай суолталаах сырыытын тирэх пуунунан буолуоҕа.

Муоста үлэҕэ киирдэҕинэ дьон тырааныспарынан сылдьар кыаҕа түөрт төгүл улаатыаҕа – 22,2 бырыһыантан 87,3 % диэри.

Муоста Иркутскай уонна Магадан уобаластарын суолунан сырыытын хааччыйыаҕа, Транссибиир уонна Байкал-Амур магистралларын Хотугу муора пуордун кытта ситимниэҕэ. “Өлүөнэ”, “Халыма” федеральнай суоллары “Бүлүү” айан суолун кытта холбуоҕа. Арассыыйа илин чааһын Охотскай муораны кытта ситимниэҕэ.

“Өлүөнэ муостата Арассыыйа Уһук Илин макроэрэгийиэнигэр барытыгар ирдэнэр. Муоста өрөспүүбүлүкэҕэ РФ 20 % сирин, сылы эргиччи сылдьар тырааныспар сырыытын, уопсайынан, биһигини ыкса олорор эрэгийиэннэрбитин кытта ситимниир магистралынан буолуоҕа. Инникитин киэҥ тырааныспар магистралын кытта холбуоҕа. Бу, чуолаан, норуоттар икки ардыларынааҕы  «Европа – Хотугу муора пуорда – Тикси – Дьокуускай – Благовещенскай – Кытай – АТР» тырааныспар суола буолуохтаах Транссибиир уонна Байкал-Амур, иккис өттүнэн Хотугу муора пуордун кытта холбуур”, – диэн Айсен Николаев бэлиэтиир.

Алтынньы 17 күнүгэр Өлүөнэ өрүс хаҥас кытылыгар технологическай былаһаакка бастакы сыбаайатын түһэрэр үөрүүлээх тэрээһин буолан ааспыта. Эрэгийиэн айылҕатын учуоттаан, Гипростроймост институт бырайыактааччылара вантовай муоста ураты тутула оҥоһуллубута. Ону 194,5-тэн 284,5 миэтэрэ үрдүктээх 3 пилон тутуоҕа. Муоста уһуна 4,6 км, икки киириилээх суол уопсай уһуна – 14,5 км.

Муоста икки балаһалаах буолуоҕа, сууккаҕа 5300 массыына сылдьарыгар суоттанар. Бу улахан далааһыннаах инженернэй тутууну Арассыыйа Бэрэсидьиэнэ Владимир Путин сорудаҕынан кылгас кэм иһигэр тутуллуохтаах – 2028 сыл бүтүүтүгэр диэри.

Бырайыагынан 26 тирэх көрүллэр: үс сүрүн  чааһыгар (русловой), атыттара өрүс икки кытылыгар массыына тиксиитигэр. Сыбаайалар уһуннара 10-40 м., диаметра – 1,5 м.

Саха сиригэр тутуллар муоста Арассыыйаҕа тутуу салаата сайдыытыгар сүҥкэн кылааты киллэриэҕэ. Бу курдук вантовай муоста ирбэт тоҥноох Арктика зонатыгар аан дойдуга өссө ханна даҕаны тутулла илик. Дойду Бэрэсидьиэнэ Владимир Путин бырайыагынан тутуллар, Уһук Илин сайдыытын национальнай бырагырааматыгар киирбит дойду устуоруйатын тырааныспардын биир суолталаах бырайыагынан буолар.

Ил Дархан уонна Бырабыыталыстыба пресс-сулууспата.