Өлүөхүмэ Абаҕатын «Чиргэл» түмсүүтэ кыбытыгынан нэһилиэгин устуоруйатын «суруйда»

Норуот маастарын күнэ ыытыллар буолуоҕуттан ыла үгүс нэһилиэктэргэ иистэнньэҥнэр түмсүүлэрэ тэриллэн үлэлиир буоллулар.

Үгүс маастар «Якутия мастеровая» быыстапкаҕа кыттан, бэрт үгүһү көрөн-истэн баран, бэйэтин нэһилиэгэр тиийэн, уонча киһилээх түмсүүнү тэрийэн, үлэлээбитинэн барар. Онон бу тэрээһин кэлиҥҥи кэмҥэ норуот маастардарын ахсаана элбииригэр олус улахан өҥөлөөх. Кэрэхсэбиллээҕэ баар, урукку сылларга көхтөөх дьон төрөөбүт нэһилиэктэрин  хаартысканан, видеонан эрэ кэпсиир буоллахтарына, билигин кыбытык иис ньыматынан нэһилиэк устуоруйатын бэртээхэй паннонан кэпсиэххэ эмиэ сөп эбит.

Ол холобурун Өлүөхүмэ улууһун Абаҕатыттан кэлбит Раиса Осипова көрдөрдө. Маастар төрөөбүт нэһилиэгэр «Чиргэл» түмсүүнү  салайан үлэлэтэр. Дьэ уонна бу маннык бэртээхэй паннону, ыйааһына суох буолан, суулуу туттуҥ да, ханна баҕарар илдьэ сылдьан көрдөрөҕүн. Бу үлэни абаҕалар нэһилиэктэрин күнүгэр, улуустааҕы араас быыстапкаларга илдьэ сылдьаллар эбит.  Онон кыбытык ньыматынан иистэнэр айар куттаах түмсүүлэр, нэһилиэккит устуоруйатын үйэтитэргэ Өлүөхүмэ Абаҕатын «Чиргэл» түмсүүтүн холобурун батыһыҥ диэн ыҥырабыт.