Өлүөхүмэ куорат олохтоохторо сүрүннээн социальнай хайысхалаах ыйытыылары биэрдилэр

СӨ Бырабыыталыстыбатын ситэриилээх былааһын отчуота Өлүөхүмэ улууһугар буолан ааста. Барыта түөрт бөлөх үлэлээн, бэҕэһээ Өлүөхүмэ куоракка түмүктээтэ.

Миниистирдэри, солбуйааччылары, туһааннаах тэрилтэлэр салайааччыларын сэргэ, Өлүөхүмэ улууһун дьокутааттара Николай Кульбертинов, Алексей Колодезников отчуот саҕаланыаҕыттан түмүктэниэр диэри оробуочай бөлөҕү кытта тэҥҥэ сылдьан үлэлэспиттэрин бэлиэтиир оруннаах.

Отчуот үгэс быһыытынан, бөлөх салайааччыта Нюргуна Соколова өрөспүүбүлүкэ бырабыыталыстыбатын ааспыт сыллааҕы ситиһиитин Өлүөхүмэ улууһугар сыһыаннаах сыыппаралары кытта тэҥнии тутан, слайданан көрдөрөн кэпсээһиниттэн саҕаланна, быйылгы соруктары билиһиннэрдэ. Салгыы улуус сайдыытыгар кылааттарын, сыралаах үлэлэрин иһин үрдүк наҕараадалары, олорор дьиэ ыларга эбэтэр туттарга социальнай төлөбүр туһунан быраабы биэрэр сибэдиэтэлистибэлэри туттардылар.

Өлүөхүмэ куорат олохтоохторун сүрүннээн социальнай эйгэ боппуруоһа долгутар: доруобуйаны чөлүгэр түһэрии, бөҕөргөтүү, социальнай эбийиэктэри тутуу, Өлүөхүмэ аэропордун саҥардыы, субсидиялаах рейс, оҕону эт-хаан өртүнэн иитии… Оробуочай бөлөх, улуус салалтата хас биирдии ыйытыыга барытыгар сиһилии хоруйу биэрдэ. Холобур, улууска психология-медиссиинэ-педагогика хамыыһыйата үлэтин тохтон эрэрин, итинэн сибээстээн инбэлиит оҕолоох дьон Дьокуускайга барарга күһэллиэхтэрин туһунан эдэр ийэ ыйытта. Бөлөх салайааччыта Нюргуна Соколова быһаарбытынан, федеральнай министиэристибэ саҥа мэтэдиичэскэй ыйыыны таһаарбытын, онно олоҕуран, хамыыһыйа улуустарга тэриллиэхтээҕин эбэтэр судаарыстыбаннай тэрилтэ (өрөспүүбүлүкэтээҕи мэтэдиичэскэй киин) хааччыйыахтааҕын быһаарда. Муниципальнай былаас уоргана структурнай салаа тэрийэллэрин дуу эбэтэр ыспыраапка биэрэр туспа юридическай сирэй аһалларын дуу туһунан быһаарыы ылыныахтаахтарын эттэ. Улуустааҕы үөрэх управлениетын начаалынньыга Андрей Солдатов иһитиннэрбитинэн, улуустааҕы хамыыһыйа сабыллыбатын туһугар үлэ бара турар эбит.

Аны Нерюнгрига доруобуйаны чөлүгэр түһэрэр кииҥҥэ Дьокуускайынан көтөргө күһэллэллэрин, Өлүөхүмэ-Нерюнгри хайысхатынан быһалыы рейс аһыллыан сөп дуо диэн ыйыттылар. Тырааныспар уонна суол хаһаайыстыбатын миниистирин бастакы солбуйааччы Анатолий Потапов дойду тырааныспарка министиэристибэтин кытта федеральнай хааһынаттан үбүлээһини үрдэтиигэ үлэ бара турарын, күн бүгүн Арктика улуустарынан социальнай суолталаах рейстэри субсидиялааһын баарын, отчуот кэмигэр Өлүөхүмэ-Иркутскай, Өлүөхүмэ-Красноярскай хайысханан субсидированнай рейстэри оҥоруу туһунан ыйытыылар киирбиттэрин, Өлүөхүмэ-Нерюнгри хайысхатынан дойду министиэристибэтигэр сайаапканы ыыппыттарын, үбүлээһинтэн тутулуктааҕын эттэ.

Былырыын Максим Алексеев туризмы сайыннарыы туһунан ыйыппыт эбит буоллаҕына, ити боппуруос быһаарыллан, быйыл оҕо эт-хаан өртүнэн сайдыытыгар сыһыаннаах боппуруоһу көтөхтө. “Өрөспүүбүлүкэҕэ икки тус-туспа министиэристибэ баар – култуура уонна успуорт. Оттон улууска иккиэн холбуу сылдьаллар. Успуорт үлэтэ көстүбэт. Оскуола таһымыгар эрэ ыытыллар. Оскуоланы бүтэрбит ыччаты кытта үлэ барбат. Онон туспа успуорт кэмитиэти тэрийэр, “Урожай” ДСО сөргүтэр, нэһилиэктэртэн күрэхтэһэ кэлэр оҕолорго бүддьүөт барыйааннаах уопсай дьиэни эбэтэр гостиница тутар  ирдэнэр. Төһөлөөх элбэх талааннаах ыччат сайдыбакка хааларый?” – диэн туруоруста. Нюргуна Соколова ыччаты эт-хаан өртүнэн сайыннарыы суолталааҕын бэлиэтээн туран, тус-туспа кэмитиэти тэрийии улуус өйөөһүнүттэн, эбии ыстааты көрүүттэн, үбүлээһинтэн тутулуктааҕын ыйда. Норуот дьокутаата Николай Кульбертинов кулун тутар 14-16 күннэригэр оҕолорго көҥүл тустууга өрөспүүбүлүкэ турнира ыытыллыаҕын иһитиннэрдэ. Ити боппуруоһунан туһааннаах министиэристибэни, улуус салалтатын кытта барыллаан кэпсэтии барбытын, бу кэскиллээх боппуруос буоларын бэлиэтээтэ.

Уопсайынан, ситэриилээх былаас үлэтин-хамнаһын нэһилиэнньэ биһириирин биллэрэр. Ону таһынан бырабыыталыстыбаҕа, дьокутааттарга махтаналлара улахан.