Өлүөхүмэ куораттааҕы өрүс пуордугар дьон уу тырааныспарын кэтэһэр саалатын үлэҕэ киллэрдилэр

Арассыыйа күнүгэр сөп түбэһиннэрэн, Өлүөхүмэ куораттааҕы өрүс пуордугар дьон уу тырааныспарын кэтэһэр күүтүүлээх-кэтэһиилээх саалатын үлэҕэ киллэрдилэр.  

— Саала олохтоох көҕүлээһини өйүүр бырагыраама иитинэн тутулунна.

Уопсай дьыалабыт туһугар кылааттарын киллэрсибит Өлүөхүмэ улууһун бары олохтоохторугар махталбын биллэрэбин. Биллэн турар, үбү хомуйуу улахан эппиэтинэстээх үлэтин ылыммыт куорат уопсастыбаннай сэбиэтин чилчиэннэригэр  анаан-минээн махтанабын.

Сотору кэминэн манна кофейня уонна чэпчэ (биотуалет) баар буолуо, кэлин быстах кэмҥэ таһаҕаһы уурар хос былааннанар, — диэн Өлүөхүмэ куорат мээрэ Сергей Щебляков тус телеграмыгар суруйар.

Манна даҕатан эттэххэ, Өлүөхүмэ пуорда улуус бары олохтоохторун хааччыйар. Сөмөлүөккэ сыана ыарахан буолан, нэһилиэнньэ сүрүннээн уу тырааныспарынан айанныыр. Онон саҥа, тупсаҕай тутууттан олохтоохтор улаханнык үөрбүттэрин биллэрэллэр. Саала көстүүтүн видеоҕа көрүҥ. Видео Өлүөхүмэ куорат мээрэ Сергей Щебляков телеграмыттан.