Өлүөхүмэ оройуоннааҕы балыыһата үрдүк технологиялаах аныгы тиэхиньикилэннэ

Саха Өрөспүүбүлүкэтигэр “Уһун уонна көхтөөх олох” национальнай бырайыагы олоххо киллэрии салҕанар. Онуоха “Сүрэх-тымыр ыарыыларын утары охсуһуу федеральнай бырайыак чэрчитинэн тымыр бастакы сүһүөх отделениеларын мэдиссиинэ аныгы тэриллэринэн түһүмэҕинэн сэбилииллэр.

Ол курдук, Өлүөхүмэ улууһун оройуоннааҕы киин балыыһата үрдүк технологиялаах мэдиссиинэ тэриллэнэн, нэһилиэнньэҕэ анал көмөнү оҥоруу хаачыстыбалаах уонна табыгастаах буолла.

Ону сэргэ саҥа тэрил эмчиттэр үлэлэрин чэпчэтэр, ыарыыны чопчу быһаарарга уонна инсульт уонна сүрэх-тымыр ыарыыларын кэнниттэн ыарыһах түргэнник чөлүгэр түһэригэр көмөлөһөр.

«Тымыр бастакы сүһүөх отделениеларын модернизациялааһын – Национальнай бырайыак чопчу түмүгэ. Саҥа тэрил уонна мэдиссиинэ үлэһиттэрин үрдүк таһыма ыарыһах доруобуйатын туруга уонна олоҕо тупсарыгар кыаҕы биэрэллэр. Ол эбэтэр мэдиссиинэ көмөтө нэһилиэнньэҕэ чугас, табыгастаах уонна көдьүүстээх буолар”, — диэтэ СӨ доруобуйа харыстыбалыгар миниистирэ Лена Афанасьева.

2025 сыл бастакы аҥаарыгар Өлүөхүмэ улууһун Оройуоннааҕы киин балыыһатын тымыр бастакы сүһүөх отделениетыгар мэйиигэ хаан эргиирэ кэһиллиилээх 27 киһи эмтэннэ.