Өлүөхүмэ оройуонугар баһаары утары үлэҕэ эбии 75 киһи тиийиэҕэ

Бүгүҥҥү күҥҥэ баһаары утары үлэҕэ уустук балаһыанньа Өлүөхүмэ оройуонугар бэлиэтэнэр. Манна уопсайа 35 тыһыынча га иэннээх сиргэ 21 ойуур баһаара умайар. Бу туһунан Саха сирин суһал ыстааба иһитиннэрэр. 

Уоту утары охсуһууга 544 киһи үлэлиир, ол иһигэр эрэгийиэннэр икки ардыларынааҕы маневр чэрчитинэн кэлбит баһаарынайдар.

СӨ айылҕаны туһаныыга, ойуур хаһаайыстыбатыгар уонна экологияҕа миниистирэ Евгений Перфильев иһитиннэрбитинэн, бүгүн Өлүөхүмэҕэ эбии 75 киһи тиийиэҕэ: Иркутскай авиабаазаттан — 50 уонна Авиалесохранаттан — 25 үлэһит.

Бэлиэтээн суруйдахха, атырдьах ыйын 8 күнүгэр өрөспүүбүлүкэҕэ 145 га иэннээх сиргэ 97 ойуур баһаара баар. Уоту утары охсуһууга 1368 киһи үлэлиир.