Өлүөхүмэ оройуонугар икки туонна гуманитарнай көмөнү ыыттылар

Бүгүн, ыам ыйын 28 күнүгэр, Өлүөхүмэ оройуонугар ЫБММ Ми-8 бөртөлүөтэ икки туонна гуманитарнай көмөнү илдьэ көттө. Бу туһунан СӨ Быыһыыр сулууспатын пресс-сулууспата иһитиннэрэр.

— Көмөнү «Биир ньыгыл Арассыыйа» баартыйа тэрийэн оҥордо. Манна баартыйалаахтар, волонтердар, Нам уонна Өлүөхүмэ оройуоннарын землячестволара, Дьокуускай түмсүүлэрэ гуманитарнай көмөнү хомуйдулар. Маныаха барытыгар логистиканы оҥоруу суолталаах, биһиэхэ СӨ Быыһыыр сулууспата уонна Ыксаллаах быһыы-майгы министиэристибэтэ көмөлөстө. Кинилэр автотырааныспардарынан уонна бөртөлүөттэринэн Өлүөхүмэҕэ, Намҥа барыта 14 туонна гуманитарнай көмө барда,— диэн «Биир ньыгыл Арассыыйа» баартыйа уопсастыбаннай өйөбүлгэ ыстаабын салайааччы Саргылаана Неустроева этэр.

Бүгүн Өлүөхүмэ оройуонугар халаан уутуттан эмсэҕэлээбит нэһилиэктэргэ генератордар, ууну хачайдыыр пуомпалар, ас-үөл, хомуллар ороннор, утуйар таҥас-сап уо.д.а. көмө тиксэриллиэҕэ.