Өлүөхүмэ оройуонун Чапаево сэлиэнньэтин таһыгар ойуур баһаарын тохтоттулар

Өлүөхүмэ оройуонун Чапаево сэлиэнньэтин таһыгар ойуур баһаарын умуруораллар. Уоту тохтоттулар, нэһилиэнньэлээх пууҥҥа куттал суоһаабат. Бу туһунан бүгүн брифиҥҥэ экология миниистирин солбуйааччы Андрей Коноплев иһитиннэрдэ.

«Бэҕэһээ 18 ч. саҕана Чапаевоттан 9 км тэйиччи сиргэ ойуур баһаара баара бэлиэтэммитэ. Баһаартан сэрэхтээх буолуу быраабылаларын кэһии түмүгэр үөскээбит. Уот 10 гектардаах сиринэн тарҕаммыт. Түүн суһаллык мобилизация ыытыллан, баһаары тохтоппуттар. Билигин ситэри умуруора сылдьаллар. Барыта 84 киһи уонна тоҕус тиэхиньикэ үлэлиир. Нэһилиэнньэлээх пууҥҥа куттал суоһаабат», — диэн Андрей Коноплев этэр.