Хаартыска: Людмила Попова.
Бырабыыталыстыба ситэриилээх былааһа Өлүөхүмэ улууһугар ааспыт сыллааҕы үлэтин отчуотун иитинэн, салайааччылар нэһилиэнньэни приемнаатылар.
Бөлөх салайааччыта, үөрэх уонна билим миниистирэ Нюргуна Соколоваҕа үөрэххэ сыһыаннаах ыйытыылаах барыта сэттэ киһи киирэ сылдьыбыт, кинилэр сүрүннээн тутууга боппуруостаахтар эбит. Бу сырыыга миниистир сылдьыбатах нэһилиэктэрин дьаһалталарын баһылыктара, оскуола салайааччылара кэлэн тутууну туруорсубуттар.
“Олохтоох урбаанньыт Максим Борисович Алексеев былырыын отчуокка кэлэн урбаан, атыы-эргиэн уонна туризм министиэристибэтигэр бэйэтин этиилэрин киллэрбитэ. Көстөрүн курдук, быйылгы отчуокка киирбит икки туристическай бааза тэриллиитигэр кини өҥөтө эмиэ баар. Быйыл туризм боппуруоһун көтөхпөтө, ол оннугар оҕо сынньалаҥын тэрийии туһунан этиилээх. Мин санаабар, оҕо эт-сиин өттүнэн үүнэригэр-сайдарыгар, патриотическай тыыҥҥа иитиллэригэр уонна куйаар ситимиттэн, гаджеттан тэйитэ түһэн айылҕаҕа сынньатарга, төрүт үгэскэ сыһыарарга бэрт идиэйэ. Дьаһалтаны кытта үлэлэһиэхпит диэн сүбэлэстибит. Лааҕыры тэрийиигэ кэккэ ирдэбиллэр бааллар. Онно сөп түбэһэр түгэнигэр лааҕыры тэрийэргэ эбэтэр туризм хайысхатынан төрөппүттэрин кытта сынньаналлара сөптөөх хайысха.
Итини таһынан, култуура, оҕону патриотическай тыыҥҥа иитии боппуруоһунан уопсастыбанньыктар киирэ сырыттылар. Хас биирдии оскуолаҕа оннук хайысха баар буолуохтаах, учууталлар көҕүлээн үлэлэтиэхтээхтэр диэн туруорсаллар. Үөрэх управлениетыгар сорудахтары ыыттым, үлэлэһиэхтэрэ.
Биир ийэ кэлэ сырытта. Кэргэнэ анал байыаннай дьайыы кыттыылааҕа, хомойуох иһин, өлбүт. Оҕото орто анал үөрэххэ төлөөн үөрэнэ сылдьар эбит. Ыраах дэриэбинэттэн кэлэн туох көмө баарын ыйыталаһар. Биһиэхэ анал байыаннай дьайыы кыттыылаахтарын дьиэ кэргэнин өйүүр миэрэлэр 2022 сылтан киирбиттэрэ. Дьон күн бүгүҥҥэ диэри билбэттэрэ, туһамматтара хомолтолоох. Ити өттүгэр үгүс үлэни ыытабыт. Төлөөн да, бүддьүөт суотугар да үөрэнэр анал байыаннай дьайыы кыттыылаахтарын устудьуон оҕолоругар ый аайы истипиэндьийэ көрөбүт уонна үөрэнэ сылдьар оҕолору тус сыаллаах үөрэххэ киллэрии баар. Сакаасчыты кытта тус дуогабар түһэрсэн, билигин төлөөн үөрэнэ сылдьар үөрэҕин салгыыр, онтон төлөбүрүн биһиги уйунабыт. Төрөппүт оҕотун кытта сүбэлэһэ барда” – диэн этэр.
Өлүөхүмэ улууһун Аҕа дойдуну көмүскүүр байыастар дьиэ кэргэттэрин кэмитиэтин бэрэссэдээтэлэ Константин Анисимов бырабыыталыстыба чилиэннэрэ улууска тиийбиттэринэн туһанан, хас даҕаны салайааччыга кэккэ боппуруостарынан приемҥа киирэ сылдьыбыт. Ол курдук, үөрэх уонна билим миниистиригэр оҕону патриотическай тыыҥҥа иитии боппуруоһунан санаатын эппит. Ону таһынан, анал байыаннай дьайыы кыттыылаахтарыгар сыһыаннаах боппуруоһун туруорсубут. “Байыаннай дьайыы кыттыылаахтарыгар учаастагы олорор сирдэринэн эрэ буолбакка, Уһук Илин уокурукка баҕарбыт сирдэригэр биэрэллэрэ буоллар диэн баҕа санаалаахпыт. Тоҕо диэтэххэ, сорох байыастар тыҥаларыгар бааһыран кэлиэхтэрэ, кинилэр сылаас килиимэттээх сиргэ олохсуйаллара ордук табыгастаах” – диэн санаатын этэр. Итини сэргэ, эмиэ уопсастыбаннай боппуруоһунан олорор дьиэ хапытаалынай өрөмүөнүн туһунан киирэн ыйыталаспыт.
Ити курдук, ситэриилээх былаас отчуотугар тиийбит салайааччылар дьону приемнаатылар, олохтоохтор долгутар ыйытыыларыгар хоруйдаатылар.
Аан дойдуга соҕотох Хомус түмэлин пуондатыгар араас дойду 1882 муусукаҕа үстүрүмүөннэрэ хараллан сыталлар. Итинтэн 1744-дэ…
СӨ экологияҕа, айылҕаны туһаныыга уонна ойуур хаһаайыстыбатыгар министиэристибэтэ саас көтөргө уонна ойуур көтөрүн бултуур кэм…
Саха сиригэр 2024 сыл ахсынньытыттан дьиэ кэргэттэри (бииригэр диэри саастаах оҕолоох ыаллары) арыаллыыр "Мэдиссиинэ көмөтө"…
Оҕо сайыҥҥы сынньалаҥын тэрийии боппуруоһунан төрөппүт аһаҕас мунньаҕа буолан ааста. Тэрийээччилэр иһитиннэрбиттэринэн ыам ыйын 15…
Мииринэй оройуонуттан Каширскайдар дьиэ кэргэттэрэ «Семья года 2025» күрэхтэһии оройуоннааҕы түһүмэҕэр биэс бастыҥ иһигэр киирдилэр.…
Кыргызстаҥҥа Ош куоракка ыам ыйын 12-13 күннэригэр "Сулайман-Тоо" диэн эдэр кинематографистар норуоттар икки ардыларынааҕы XII…