Өлүөхүмэҕэ эмсэҕэлээбит нэһилиэктэргэ күннэтэ гуманитарнай көмө оҥоһуллар
![](https://sakha-sire.ru/wp-content/uploads/2024/05/photo_2024-05-18_14-07-43-1-1060x596.jpg)
Өлүөхүмэ улууһун баһылыга Николай Харбин халаан уутуттан эмсэҕэлээбит нэһилиэнньэлээх пууннарга гуманитарнай көмө күннэтэ ыытыллар диэн иһитиннэрэр.
Бу өрөбүллэргэ Кыыллаах нэһилиэгэр көмөнү туттулар, ону тэҥэ 1-кы Нөөрүктээйи нэһилиэгэр уматыгы тиэртилэр. Николай Харбин нэһилиэнньэҕэ күүс-көмө буолар, тиэхиньикэнэн уонна көмөнү тиэрдэн биэрэр дьоҥҥо-сэргэҕэ махталын биллэрдэ.
![](https://sakha-sire.ru/wp-content/uploads/2024/05/050d4bea-6fdc-4ca1-a7cd-298343d15f54-1060x596-1-e1716130811627.jpeg)
Оройуон баһылыга этэринэн, олохтоохтор хаһан да туора туран хаалбакка, өрүү көмөлөһөллөр. Үгүс нэһилиэктэринэн көмө хомуйууга саҥа пууннар аһыллыннылар, гуманитарнай көмөнү ылыы үлэ уонна өрөбүл күннэргэ быыстала суох ыытыллар.
Ону кытта бэҕэһээ, ыам ыйын 19 күнүгэр, улуус дьаһалтата икки массыынанан 2 туоннаттан тахса гуманитарнай көмөнү хомуйан уонна 600 лиитэрэ оттугу ыыттылар диэн дьаһалта пресс-сулууспата суруйар (иһэр уу, ас-үөл, генератордар, мотопомпалар, тепловой пушкалар, гаас баллоннара, таҥас-сап, аадырыстаах баһыылкалар).
Санаттахха, уу таһыма үрдээн Өлүөхүмэҕэ үс нэһилиэнньэлээх пууннары ылбыта. Онон Өлүөхүмэҕэ ыксаллаах быһыы-майгы эрэсиимэ олохтоммута. Намыһах сирдэринэн уу киирэн Кыыллаах, 1-кы Нөөрүктээйи уонна Хоро нэһилиэктэригэр сорох сиринэн дьиэлэр ууга барбыттара.
Сообщить об опечатке
Текст, который будет отправлен нашим редакторам: