Өлүөхүмэ улууһугар үс оробуочай бөлөх нэһилиэктэринэн отчуоттуур

Өлүөхүмэ улууһугар үс оробуочай бөлөх нэһилиэктэринэн тарҕанан отчуоттуур.

Улууска СӨ ситэриилээх былааһын отчуота салҕанар. Олунньу 14 күнүгэр тыа хаһаайыстыбатын миниистирэ Александр Атласов салайааччылаах оробуочай бөлөх Үҥкүр сэлиэнньэтин олохтоохторугар отчуоттаата. Кинини кытары СӨ Доруобуйа харыстабылын миниистирин бастакы солбуйааччы Дмитрий Сергин, улуус баһылыгын сири-уоту сайыннарыыга солбуйааччы Петр Федоров уонна управлениелар, улуус тэрилтэлэрин салайааччылара бааллар.

Бөлөх салайааччыта Александр Атласов бэлиэтээбитинэн, көрсүһүү кэмигэр тыа хаһаайыстыбатын, социальнай, доруобуйа харыстабылын эбийиэктэрин тутуу уонна дьиэ-уот, коммунальнай хаһаайыстыба туһунан боппуруостар хото бэрилиннилэр.

Онтон СӨ Үөрэххэ уонна наукаҕа миниистирин бастакы солбуйааччы Михаил Присяжнай оробуочай бөлөҕө Дьокуускайтан көтөн кэлээт, Өлүөхүмэ сэлиэнньэтигэр үлэлээтэ.
Бөлөх тута Амма-Өлүөхүмэ оскуолатыгар сырытта. Олохтоохтор оскуола сүрүн дьиэтин өрөмүөнүгэр көмөлөспүттэригэр махтаннылар. Ону сэргэ, алын сүһүөх кылаастар үөрэнэр оскуолаларыгар өрөмүөн наадатын эттилэр. Учууталлар тиийбэттэрэ биир кыһалҕаҕа кубулуйбут. Онуоха олохтоохтор үрдүк үөрэх кыһатын бүтэрээччилэри улуустарга анааһын үгэһин сөргүтэргэ, «Тыа сирин учуутала» бырагыраама кыттаачыларын ахсаанын элбэтэргэ эттилэр. Михаил Юрьевич бу бырагыраама суотугар олохтоох каадырдары үүннэрэргэ сүбэлээтэ.

Улууска иккис күнүн үлэлиир СӨ Үп миниистирин бастакы солбуйаачы Иван Алексеев бөлөҕө бу күн Мархаҕа, Урицкайга, Хороҕо үлэлээтэ. Кинилэр бүгүн, олунньу 15 күнүгэр, ыраах сытар Куду Күөл, Тээнэ, Бэс Күөл, Токко олохтоохторугар отчуоттуу көттүлэр.