Өлүөхүмэ улууһун дьаһалтатын исписэлииһэ ыстарааптанна

Өлүөхүмэ улууһун дьаһалтатын быстах кэмҥэ баһылыгын эбээһинэһин  толорооччу иэстээх үлэһит хамнаһыттан харчыны тутарга сөптөөх дьаһал ылымматах, диэн СӨ Суут бириистэптэрин управлениетын пресс-сулууспата иһитиннэрэр.

Ол курдук, биир дьаһалта үлэһитэ 400 тыһ. солк. тахса суумалаах кирэдьииккэ иэстээх эбит. Суут быһаарыытынан, иэстээх үлэһит хамнаһыттан харчыны тутар туһунан уураах ыытыллыбыт. Ол эрээри, хамнастан харчыны тутуу оҥоһуллубатах, оттон уураах кумааҕытын дьаһалта сүтэрбитэ быһаарыллыбыт. Бэрэбиэркэ кэмигэр суут бириистэбинэн сокуоннай ирдэбили Өлүөхүмэ дьаһалтатын быстах кэмҥэ баһылыгын эбээһинэһин  толорооччу толорботоҕо быһаарыллыбыт. Матырыйааллары көрүү түмүгүнэн, дуоһунастаах сирэй административнай быраабы кэһиини оҥорбутунан буруйдааҕынан билинэргэ уонна ыстарааптыырга быһаарыы ылыныллыбыт.