Өлүөхүмэ улууһун олохтоохторо дьаарбаҥкаҕа кытыннылар

Өлүөхүмэ улууһугар “Үлэлиир Саха сирэ. Каадыр” бырайыагы олоххо киллэрии иитинэн “Нерюнгри-Металлик” ХЭУо (Нордголд) каадырынан хааччыйыы боппуруостарынан мунньах буолан ааста. Ити күн Нордголд хампаанньа улуус олохтоохторугар анаан вакансия дьаарбаҥкатын тэрийдэ.

“Үлэлиир Саха сирэ. Каадыр” бырайыагынан бииргэ үлэлэһии саҥа көрүҥэ олоххо киирэн, каадыры бэлэмнээһиҥҥэ үөрэх тэрилтэлэрэ, баахтанан таһыыга  тырааныспар хампаанньалара, улуус олохтоохторуттан үлэһиттэри идэлэринэн сүүмэрдээһиҥҥэ улуус итиэннэ баар вакансиялар, ирдэбил, үлэ усулуобуйатын, рудникка олоруу туһунан нэһилиэнньэҕэ иһитиннэриинэн хампаанньалар бэйэлэрэ быһаччы кыттыахтаахтар эбит.

Нэһилиэнньэ дьарыктаах буолуутун судаарыстыбаннай кэмитиэтин бэрэссэдээтэлин бастакы солбуйааччы Анастасия Позднякова: “Көмүһү хостуур тэрилтэни кытта бииргэ үлэлэһии бастакы бырайыагынан Өлүөхүмэ тиэхиньикумугар АIII категориялаах улахан массыыналар суоппардарын бэлэмнээһин буолуоҕа. Кинилэр салгыы “Нерюнгри-Металлик” ХЭУо үлэлии киириэхтэрэ, тиэхиньикум үрдүкү кууруһун устудьуоннарын үөрэтэр-производственнай быраактыкаларын  Гросс рудникка тэрийиэхтэрэ”, – диэн этэр.

Нордголд хампаанньа Саха сиринээҕи бэрэстэбиитэлистибэтин салайааччыта Андрей Варламов Өлүөхүмэ улууһугар аан бастакытын дьаарбаҥканы тэрийбиттэрин, маннык элбэх киһи кэлиэ дии санаабатахтарын этэр. “Үлэ усулуобуйата вахтовай ньыманан, 45 күн баран үлэлииллэр уонна 45 күн сынньаналлар. Рудникка барыта 1973 киһи үлэлиир эбит буоллаҕына, итинтэн 73 киһи Саха сирин олохтооҕо. Онон дьаарбаҥкаҕа элбэх киһи кэлбитэ үөрдэр.

Биһиги олохтоох тиэхиньикуму кытта бииргэ үлэлэһиигэ сөбүлэҥ түһэрсибит буолан, улахан тиэхиньикэ үлэһиттэрин үөрэтиигэ үлэ бара турар. Кулун тутартан манна теорияҕа үлэ саҕаланыаҕа, онтон быраактыканы биһиэхэ рудникка муус устар-ыам ыйыгар бараллара былааннанар.

Миэстэтигэр бэйэбит уопсайдаахпыт, остолобуойдаахпыт, спортивнай комплекстаахпыт, миэдиктэрдээхпит,  онон  дьон сынньанарыгар уонна үлэлииригэр усулуобуйа барыта баар” – диэн этэр.

Манна даҕатан эттэххэ, Нордголд хампаанньа уонна Өлүөхүмэтээҕи тиэхиньикум бииргэ үлэлэһиигэ сөбүлэҥ түһэрсибиттэр. Үлэлиэн баҕалаах дьон тиэхиньикумҥа миэстэтигэр үөрэнэр кыахтаннылар.  Онҥ тэҥэ, хампаанньа инникитин улууска анал кылаастары арыйар туһунан кэскиллээх толкуйдаах.

Улуустааҕы нэһилиэнньэ дьарыктаах буолуутун киинигэр буолбут вакансия дьаарбаҥкатыгар аантан саҕалаан уочарат. Улуус дэриэбинэлэриттэн тиийэ эр дьон кэлэн анкета толордулар, сэһэргэһиини аастылар.

Денис, тиэхиньиичэскэй идэлээх эдэр киһи:

— Томскайга үрдүк тиэхиньиичэскэй идэни бүтэрбитим. Ол кэнниттэн аармыйаҕа сулууспалаан кэллим. Манна үлэ миэстэтин буллум эрээри, исписээлинэспиттэн арыый атын соҕус. Онон бу сүбэлэһиигэ кэллим, сайабылыанньабын биэрэн көрүөм.

Антон, улахан уйуктаах тиэхиньикэлэргэ үлэлиир уопуттаах:

— Бэйэм Өлүөхүмэ олохтооҕобун. Алдаҥҥа, Нерюнгригэ араас тиэхиньикэлэргэ үлэлээбитим уонча сыл буолла. Манна тэрилтэҕэ үлэлээн көрдүм да, хамнас кыра, сыана үрдүк. Улахан тиэхиниькэҕэ үлэлииргэ АIII категориялаахпын. Ханнык тиэхиньикэлээхтэрин, үлэлиир сиргэ хайдах тиийиэххэ сөбүн, хамнас төһөтүн, уопсайынан, үлэ усулуобуйатын билсэ кэллим.