Өлүөхүмэ улууһун Заречнай бөһүөлэгэр саҥа оскуола үлэҕэ киирдэ

Бэҕэһээ, алтынньы 20 күнүгэр,  Өлүөхүмэ улууһун Заречнай бөһүөлэгэр 60 миэстэлээх саҥа оскуола үлэҕэ киирдэ. Дьиэ үөрүүлээх аһыллыытыгар СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников кыттыыны ылла, диэн www.sakha.gov.ru иһитиннэрэр.

«Биһиги бары күүппүт бырайыакпыт, дьэ, олоххо киирдэ, оҕолор кэрэ бэлиэ оскуолаланнылар. Эбийиэк бэлэм: ис үлэлэр барыта түмүктэннэ, саҥа тэрил уонна миэбэл туруорулунна, ититии, уунан хааччыйыы уонна салгылатыы систиэмэлэрэ тардылынна», – диэн Дмитрий Садовников бэлиэтээтэ.

Кини этэринэн, икки тыһыынча кэриҥэ квадратнай миэтэрэ иэннээх саҥа оскуола сырдык кылаастардаах, аныгылыы тэриллээх, оҕолор хаачыстыбалаах үөрэҕи ылалларыгар бары усулуобуйаны тэрийэр. Ону таһынан хас биирдии оҕо табыгастаах уонна аныгылыы усулуобуйаҕа үөрэнэр бырааптааҕын бэлиэтээтэ.

«Биһиги маннык оскуолалар нэһилиэктэрбитигэр өссө элбииллэрин туһугар үлэбитин салгыахпыт», – диэтэ СӨ Бырабыыталыстыбатын бэрэссэдээтэлин бастакы солбуйааччыта.

Үөрэх саҥа эбийиэгэ СӨ «Тыа сирин биир кэлимник сайыннарыы» судаарыстыбаннай бырагырааматын «Мин Сахам сирэ XXI үйэҕэ» үтүө дьыалалар өрөспүүбүлүкэтээҕи хамсааһыннара» биэдэмистибэннэй бырайыагын чэрчитинэн тутулунна. Аныгылыы үөрэх инфраструктуратын сайыннарыы өрөспүүбүлүкэ сүрүн хайысхатынан хаалар. 2018 сылтан 2025 сылга диэри Саха сиригэр 160-тан тахса үөрэх эбийиэгэ тутулунна. 2025 сылга  Владимир Путин көҕүлээбит, үүнэр көлүөнэни иитиигэ уонна үөрэтиигэ саҥа кыахтары арыйар «Ыччат уонна оҕолор» саҥа национальнай бырайыак олоххо киирэр.