Өлүөхүмэ волонтердара — буойуттарыгар

Өлүөхүмэ оройуонун Волонтердарын киинин салайааччыта Татьяна Курганова улууска 2022 сыллаахха тэриллибит киин үлэтин сүрүн хайысхатынан байыаннай эпэрээссийэҕэ кытта сылдьар биир дойдулаахтарыгар көмөнү оҥоруу буоларын кэпсээтэ.

— Быстах хомуур биллэриллээтин кытта биһиги хамаандабыт байыаннай сулууспалаахтарбытыгар көмөнү оҥорууга тута көхтөөх үлэни саҕалаабыта. Уолаттарбыт Хабаровскайга уонна Владивостокка байыаннай чааска баралларыгар аптечканан уонна бастакы суолталаах туттар малынан хааччыйарга кыһаллыбыппыт. Бастаан утаа, уустуга диэн, үлэбитин туохтан саҕалыырбытыгар мунаахсыйыы баар курдуга уонна уолаттарбыт ханна, ханнык чааска баалларын, туохха ордук наадыйалларын билбэт этибит. Билигин үлэбит чуолкайданан, барыта орун-оннугар буолла, тэрээһин үчүгэй. Волонтер киинигэр Ил Дархан Айсен Николаев уонна бырабыыталыстыба бэрэссэдээтэлин солбуйааччы Ольга Балабкина кэлэ сылдьан, үлэбитин билсибиттэрэ.

Күн бүгүн улуустан байыаннай сулууспаҕа сылдьар бары дьоммутугар куратордар сыһыарыллан үлэлииллэр. Оройуоммут дьаһалтатын көмөтүнэн буойуттарбытыгар көмөнү тиэрдиигэ чуолкай логистическай ситим олохтоммута. Улууспут дьаһалтата байыаннай эпэрээссийэ сиригэр баар дьоммутугар гумантарнай көмөнү уонна тус аадырыстаах баһыылкалары Ростовка үлэлии сылдьар волонтердарбыт миэстэтигэр тиксэриилэригэр диэн массыына анаабыта. Онон биһиги волонтердарбыт байыаннай сулууспалаахтарга наадалааҕы барытын кэмигэр сөпкө тиэрдэ тураллара ситиһилиннэ. 2022 сыл балаҕан ыйыттан ыла «Посылка солдату из Олёкмы» диэн аахсыйаны хаста да тэрийэн ыыттыбыт. Туоннаттан ордук гуманитарнай таһаҕас тиэрдилиннэ: ол иһигэр 50-тан тахса араас тэриллэр (тепловизионнай прицеллар, квадрокоптердар, рациялар, сүүһүнэн оҕолор суруктара, уруһуйдара, кинилэр тикпит малы уктар суумкалара уо.д.а.). Кииҥҥэ киирэр сайаапкалары биири да көтүппэккэ, барыларын көрөн, сөптөөх көмө тута оҥоһулларыгар кыһаллабыт.

Биһиги улууспут олохтоохторун амарах санааларын, көхтөөх кыттыыларын, түмсүүлээхтэрин бэлиэтиир тоҕоостоох. Ол курдук хас биирдии киһи тугунан эмэ көмөлөстөрбүн диэн кэлэ тураллара үөрдэр. Байыаннай сулууспалаахтарбытыгар тэрилтэлэрбит, урбаанньыттарбыт, биирдиилээн дьоммут матырыйаалынай уонна моральнай өйөбүллэрин оҥоро туралларыгар барҕа махтал тылларын этэбит.