Өлүөхүмэ  заповеднигар турбут баһаары умуруордулар

Саха сиригэр ааспыт сууккаҕа 7 тыһ. гектардаах 6 сиргэ турбут ойуур баһаарын умуруордулар. Итинтэн 3-һэ Өлүөхүмэ заповеднигар тахсыбыт баһаар буолар.

Бу туһунан сарсыарда СӨ экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы Андрей Коноплев иһитиннэрдэ.

Ол кэмҥэ Саха сиригэр салгынынан уонна космостан кэтээн көрүү түмүгэр саҥа 508 гектар иэннээх сиргэ 4 ойуур баһаара турбута бэлиэтэннэ.

Бүгүҥҥү туругунан 15 улууска 69 ойуур баһаара баара биллэр. Онтон Үөһээ Бүлүү, Бүлүү, Горнай, Кэбээйи, Ньурба уонна Өлүөхүмэ улуустарыгар уопсайа 50 тыһ. гектар иэннээх сиргэ турбут 7-тэ баһаар бохсулунна. Баһаарга уопсайа 1713 киһи уонна 138 тиэхиньикэ, авиация үлэлии сылдьар.