Өлүөхүмэҕэ «Альфа» кулууп иитиллээччитэ буулдьанан ытыыга чөмпүйүөннээтэ

Өлүөхүмэ сэлиэнньэтигэр Дьоруой, Өлүөхүмэ сирин чулуу уола Евгений Китчегясов сырдык кэриэһигэр анаммыт буулдьанан ытыыга улуустааҕы күрэхтэһии түмүктэннэ.

Турнирга Өлүөхүмэ, Уус-Алдан, Үөһээ Бүлүү, Таатта, Чурапчы, Мэҥэ-Хаҥалас улуустарыттан 70-тан тахса кыттааччы муһунна. Бу туһунан Саха сиринээҕи Росгвардия пресс-сулууспата иһитиннэрэр.

Бары кыттааччылар «Тииҥчээн» эрчиллиини толордулар. Хас биирдии ытааччы 10 миэтэрэ ыраахтан салгын саатынан олорон, сытан уонна туран 1 мүнүүтэ иһигэр 5-тэ ытта. Турнир түмүгүнэн 12-18 саастаах кыргыттар уонна уолаттар ортолоругар 37 очконан  «Альфа» байыаннай-патриотическай кулууп иитиллээччитэ Валерия Катанцева бастакы миэстэни ылла.

Санатан эттэххэ, «Альфа» БПК салайааччытынан тас харабыл үлэһитэ, полиция старшай лейтенана Алексей Антонов буолар.