Өлүөхүмэҕэ Бе-200 сөмөлүөт көттө
![](https://sakha-sire.ru/wp-content/uploads/2024/07/v-olekminskiy-rayon-vyletel-samolet-be-200-mchs-rossii_17200518001366150944__800x800-800x596.jpg)
ЫБММ Саха сиринээҕи салаата иһитиннэрбитинэн, бүгүн, от ыйын 4 күнүгэр, Өлүөхүмэ улууһугар ЫБММ Бе-200 амфибия-сөмөлүөт көттө. Санатан эттэххэ, улууска Тээнэттэн, Бэс Күөлтэн, Куду Күөлтэн уонна Дабаантан 7-10 км сирдэргэ баһаардар турбуттара.
«Бүгүн айылҕа баһаардарын умуруорууга Өлүөхүмэҕэ Бе-200 суудуна көттө. Маны таһынан балаһыанньа сытыырхайдаҕына, өссө биэс этэрээт уонна аэромобильнай бөлөх бэлэм олороллор. Итиэннэ Дьокуускайга ЫБММ өссө икки көтөр аала баар», — диэн ЫБММ Саха сиринээҕи управлениетын начаалынньыга Павел Гарин иһитиннэрдэ.
Билигин Өлүөхүмэҕэ Тээнэ сэлиэнньэтиттэн 7 км сиргэ 3 000 га сир умайар. Уоту утары охсуһууга 55 киһи үлэлиир. Бэс Күөлүттэн 9,8 км сиргэ 7,4 тыһ. га сир умайар. Манна 88 киһи уонна 1 техника үлэлииллэр. Бу баһаар Тарыҥнаах үрэх нөҥүө баар. Куду Күөлтэн 9 км сиргэ баар баһаар иэнэ 5 га. Манна 42 киһи үлэлиир, билиҥҥитэ баһаар бохсулунна. Дабаан сэлиэнньэтиттэн 7,6 км сиргэ баһаар баар.
Авиалесоохрана чахчыларан, күн бүгүн өрөспүүбүлүкэ территориятыгар 119 айылҕа баһаара баар. Суукка устата 10 айылҕа баһаарын умуруордулар.
Сообщить об опечатке
Текст, который будет отправлен нашим редакторам: