Өлүөхүмэҕэ бөртөлүөт уонна 26 быыһааччы баһаары умуруора бардылар

Өлүөхүмэ улууһугар ЫБММ кылаабынай дириэксийэтин уонна Саха сирин Быыһыыр сулууспатын  26 быыһааччыта бардылар.  Суһал балаһыанньаны сэрэтэр уонна баһаартан куттал суох буолуутун хааччыйар хамыыһыйа мунньаҕар муниципальнай тэриллии ыксаллаах балаһыанньата көрүлүннэ.

Саамай уустук балаһыанньа Өлүөхүмэ улууһун Дабаан нэһилиэгиттэн 13 км тэйиччи баһаарга баар. Онно эмиэ уу баһар тэриллээх бөртөлүөт ыытылынна. Арассыыйа Ыксаллаах быһыыга-майгыга министиэристибэтин «Бе-200» амфибия сөмөлүөтэ үлэлиэхтээх, ону тэҥэ, бүгүн Бүлүү улууһун  Кыһыл Сыыр сэлиэнньэтин аттыгар баар баһаарга үлэлиэҕэ.

Бырабыыталыстыба бэрэссэдээтэлин бастакы солбуйааччы Дмитрий Садовников этэринэн, нэһилиэнньэлээх пууннартан 15 км тэйиччи баар 14 ойуур баһаара ураты болҕомтону ылар. Бу баһаардартан биэһэ төгүрүтүллүбүт, улаатар кыахтара суох.

“Балаһыанньа күн аайы уларыйа турар. Соторутааҕыта эрэ саамай улахан кыһалҕаны Нерюнгри оройуонун Хани аттыгар баһаар таһаарбыта, ол эрээри ардах түһэн уонна ыытыллыбыт үлэ кэнниттэн онно балаһыанньа көммүтэ”, — диэн кини эттэ.

Бүгүҥҥү күҥҥэ Саха сиригэр 298 тыһыынча гаа иэннээх сиргэ 113 ойуур баһаара умайар. Үксүлэрэ киһи кыайан тиийбэт сирдэригэр бааллар.

Баһаары умуруорууга 1605 киһи уонна 77 тиэхиньикэ үлэлиир. Авиация үлэлиир. Авианан ботуруулга 20 салгын суудуната уонна “Авиалесоохрана” биэс  Ми-8 бөртөлүөтэ баһаары умуруорууга күүскэ үлэлии сылдьаллар.

Ил Дархан, бырабыыталыстыба пресс-сулууспата.