Өлүөхүмэҕэ борокуратуура эргэрбит сибээс баҕаналарын өрөмүөннүүргэ эбээһинэстээтэ

Өлүөхүмэ оройуонун борокуратуурата сибээс туһунан федеральнай сокуон толоруллуутун бэрэбиэркэлээтэ. Бэрэбиэркэ түмүгүнэн, Өлүөхүмэ куоракка уонна тыа нэһилиэктэрин сирдэригэр-уоттарыгар 100-тэн тахса алдьаммыт, улаханнык иҥнэйбит, сууллар кутталлаах сибээс лииньийэтин баҕаната баара быһаарыллыбыт.

Сокуон ирдэбилин кэһэн, эргэрбит уонна туһаныллыбат сибээс баҕаналарын булар, уларытар уонна бөҕөргөтөр үлэлэр ыытыллыбаттахтар. Онон сибээстээн, оройуон борокуратуурата  «Ростелеком» ПАУ-ну өрөмүөн үлэлэрин оҥорорго эбээһинэстиир туһунан дьыаланы суукка ыыппыт. Дьокуускайдааҕы куорат суута борокуратуура ирдэбилин толордо, быһаарыы сокуоннай күүһүгэр киирдэ. Билиҥҥи кэмҥэ баҕаналар сорохторо чөлүгэр түһэрилиннилэр, эргэлэрэ көтүрүлүннүлэр, үлэ салҕанар. Суут быһаарыыта тиһэҕэр диэри толоруллуута оройуон борокуратууратын хонтуруолугар турар.