Өлүөхүмэҕэ чаҕылҕан чаҕылыйда, этиҥ эттэ

Бүгүн Өлүөхүмэҕэ этиҥ эттэ, чаҕылҕан чаҕылыйда диэн кэпсээн Саха сирин үрдүнэн тарҕанна. Кырдьык, оннук үһү дуо диэн төлөпүөн үрдүгэр түһэн туоһуластыбыт.  Тыа хаһаайыстыбатын управлениетын көмөтүнэн Кыыллаахха эрийдибит.

— Биһиги, тыа дьоно, сүөһүлээх-астаах буоллахпыт. 10 чаас саҕана хотоммутугар сырыттахпытына, чаҕылҕан чаҕылыйда.  Онтон аны сайыҥҥы этиҥ этэрин курдук тыас да тыас. Соһуйан өлө сыстыбыт. Онтон уурайда. Бүгүн халлааммыт, дьиҥинэн, ичигэс. -5 кыраадыс. Киһи атаҕар хаар сыста сылдьар. Ону тэҥэ бүгүнү быһа тыал да тыал, хаардыыр. Дьэ, Кыыллаахха бүгүн итинник күн-дьыл турар, — диэн төлөпүөнүнэн кэпсээтэ  Кыыллаах нэһилиэгин баһылыгын солбуйааччы Дмитрий Викторович Чердонов.

Хаартыска: ТХУ ыытта, видео социальнай ситимтэн.