Өлүөхүмэҕэ, Мииринэйгэ Дьиэ кэргэн элбэх өҥөнү оҥорор кииннэрэ аһылыннылар

Саха сиригэр өссө икки Дьиэ кэргэн элбэх өҥөнү оҥорор кииннэрэ аһылыннылар. Кииннэри Айсен Николаев балаҕан ыйын 27 күнүгэр, Судаарыстыбаннас күнүгэр, Өлүөхүмэ уонна Мииринэй оройуоннарыгар арыйда.

Өрөспүүбүлүкэҕэ барыта  алта Дьиэ кэргэн элбэх өҥөнү оҥорор киинэ үлэлиир. Чурапчы, Нам, Уус Алдан улуустарыгар уонна Дьокуускай куоракка бааллар.

Арассыыйа бэрэсидьиэнэ Владимир Путин ыйыытынан дьиэ кэргэн МФЦ-ларын тэрийэр пилотнай бырайыак олоххо киирэн, «Дьиэ кэргэн» национальнай бырайыак биир сүрүн соругунан буолар. Бырайыак сүрүн сыалынан дьиэ кэргэн сыаннастарын бөҕөргөтүү, элбэх оҕолоох дьиэ кэргэн ахсаанын элбэтии уонна  көхтөөх уһун үйэлэниигэ көмөлөһүү, наадыйар дьоҥҥо үрдүк хаачыстыбалаах көрүү-истии усулуобуйатын тэрийии буолар.

Нам сэлиэнньэтигэр  «Берегиня» киин базатыгар Дьиэ кэргэн элбэх өҥөнү оҥорор киинэ аһылынна. Нам улууһугар ханнык баҕарар дьиэ кэргэн кииҥҥэ эрийэн, көмөнү эбэтэр консультацияны ылыан сөп. Манна социальнай өҥөлөр, социальнай өйөбүл, төрөппүт уонна оҕо сыһыаннарын кыһалҕаларын быһаарыы, о.д.а. киирэллэр.

Бастакы приемнай отделение биир кэлим бириинсибинэн үлэлиир, исписэлиис ирдэбиллэри түргэнник көрөр уонна дьиэ кэргэттэргэ социальнай өҥөлөрү ыларга көмөлөһөр. Ону тэҥэ, суһал психологическай көмө салаата, ону тэҥэ социальнай өҥөлөргө уонна социальнай өйөбүлгэ салаа баар.

Биэдэмэстибэлэр икки ардыларынааҕы бииргэ үлэлээһин чэрчитинэн, бу үлэҕэ социальнай партнердар көхтөөхтүк көмөлөһөллөр. «Оҕолорго анаан күнүскү уһуйаан бөлөҕө» бырайыак сайыҥҥы кэмҥэ олоххо киирэр, ону тэҥэ байыаннай дьайыы  кыттыылаахтарын кэргэттэрин  түмэр, өйөһөр соруктаах «Дьоруойдар кэргэттэрэ» кулууп үлэлиир.

Олоххо уустук балаһыанньаҕа түбэспит оҕолоох дьахталларга «Күн саһарҕата» диэн кризиснай приют баар. Оҕолоох ийэлэргэ уонна ыарахан балаһыанньаҕа түбэспит хат дьахталларга, ол иһигэр дьиэ кэргэҥҥэ күүһүлээһин сиэртибэлэригэр босхо дьиэ биэрэр. Амарах санаалаах дьон ийэлэргэ уонна оҕолорго аһынан-үөлүнэн, оҕо аһылыгынан, оонньуурдарынан уонна таҥаһынан көмөлөһөллөр.

Оҕону көрүү уонна хонтуруол эмиэ баар. Хас биирдии дьиэ кэргэн туспа, кэлим көмөнү уонна кириисиһи утары охсуһуу бырагырааматын ылар.

Дьиэ кэргэн элбэх өҥөнү оҥорор кииннэрэ Арассыыйа Үлэҕэ уонна социальнай көмүскэл министиэристибэтин, ыарахан балаһыанньаҕа түбэспит оҕолору өйүүр пуонда пилотнай бырайыага буолар. 2022 сыл ахсынньытыттан маннык кииннэр РФ аҕыс эрэгийиэнигэр аһылыннылар.