Өлүөхүмэҕэ ньиэп тоҕунна

Бэҕэһээ, бэс ыйын 15 күнүгэр, Өлүөхүмэ оройуонугар «ЛОРП» ПАУо баржатыгар ньиэп бородууктатын тиэйии кэмигэр ньиэп тоҕунна.

«Өлүөхүмэ нефтебаза» филиалын үлэһиттэрэ «ЛОРП» ПАУо суудунаттан танкер туолбутун туһунан сигнал биэрээтин кытта, суһаллык ньиэп бородууктатын тиэйиини тохтоппуттар. Манна даҕатан эттэххэ, танкерга тиэйиллэр ниэп кээмэйин суудуна хамаандата быһаарар.
Ньиэп ууга салгыы тарҕамматын туһугар туһааннаах үлэ ыытылынна уонна тохтубут ньиэп бородууктатын ыраастыыр былаан оҥоһулунна. «Саханефтегазсбыт» АУо суһаллык тахсыбыт саахалы туоратыы үлэтин саҕалаата. Онно эбии «Газспассервис» аварийнай-быыһыыр тэрилтэ үлэһиттэрэ бардылар диэн «Саханефтегазсбыт» АХ пресс-сулууспата суруйар.