«Өлүөхүмэҕэ оппут тэбиитэ тэтимнээх»

Быйыл Өлүөхүмэ улууһугар төһө даҕаны Өлүөнэ эбэбит халааннаан сири нүөлсүппэтэҕин иһин, ааспыт күһүн, балаҕан ыйын быһа түспүт ардахтартан сирбит тот кыстаан, итиэннэ, ыам ыйын бүтүүтэ, бэс ыйын саҕаланыыта ардахтаан, ол кэннэ сылыйыы буолан оппут тэбиитэ тэтимнээх.

Ол курдук, бу ый ортотугар от тахсыыта хойуу уонна миэстэтинэн киһини тобугунан үрдүктээх. Аны, сыһыыга сылгы ньургуһуна дэлэйдик тахсан, ходуһа харах ыларынан туналыйан сырдаан сытар. Миэстэтинэн, ордук кырдал сирдэринэн наар арахсыбат абааһы тайаҕа от үүнэ турара, арай, куһаҕан. Өлүөхүмэлэр, онон, быйыл оту өлгөмнүк оттуурга эрэллээхтэр.Аһыҥка эрэ ыһан кэбиспэтэр, ханнык.

Александр Бири, Арассыыйа Суруналыыстарын сойууһун чилиэнэ, Өлүөхүмэ.