Өлүөхүмэҕэ төрүөх үчүгэй

Саха сиригэр сорох хаһаайыстыбаларга ынахтар хайыы-үйэ төрөөтүлэр. Ол эрээри маассабай төрүөх кулун тутар, муус устар, ыам ыйдарыгар буолуоҕа. Ынах төрөөһүнэ Өлүөхүмэ улууһугар атыттардааҕар үчүгэй көрдөрүүлээх. Ньирэйдэр туруктара үчүгэй.

— Өлүөхүмэ улууһугар Худаевтар бааһынай хаһаайыстыбаларыгар (30 %), “Кладовая Олекмы” хаһаайыстыбаҕа (40 %) төрөөтүлэр. Ньурба улууһун сорох бааһынай хаһаайыстыбаларыгар ынахтар төрөөһүннэрэ бэлиэтэннэ. Холобура, Дьаархаҥҥа “Васильев ИП” 25 ынаҕыттан 4-дэ төрөөтө. Ону тэҥэ Амма улууһугар Бөтүҥҥэ, Хаҥалас улууһун Нөмүгүтүгэр. Үчүгэй хаһаайыстыбаларга төрүөх туруга  итинник, — диир “Сахаагроплем” тэрилтэ зоотехнига Татьяна Протопопова.

Кини билигин тыһаҕастары олунньу ый бүтүүтэ, кулун тутар саҥатыгар искусственнайдык буоһаттаралларыгар сүбэлиир. Билигин “Сахаагроплем” тэрилтэ ыстаансыйатыгар 40 атыыр оҕус турарыттан 29-һа сиэмэ биэрэр эбит.