Өлүөхүмэлэр ситэриилээх  былаас үлэтин «үчүгэйинэн» сыаналаатылар

СӨ Ситэриилээх былааһын быйылгы отчуота Өлүөхүмэ улууһугар олунньу 13-18 күннэригэр буолла. Оробуочай бөлөх үс бөлөххө хайдыһан, Өлүөнэ кытылын кыйа уонна уҥуор сытар нэһилиэктэргэ, ону сэргэ саамай ыраах Куду Күөл, Тээнэ, Бэс Күөл, Токко олохтоохторугар тиийэн отчуоттаата, нэһилиэнньэ кыһалҕаларын, баҕа санааларын, этиилэрин иһиттэ.

р Өлүөхүмэ куоракка ситэриилээх былаас отчуота саҕаланыан иннинэ оробуочай бөлөх салайааччылара уонна бэрэстэбиитэллэрэ нэһилиэнньэни кытары тус көрсүһүүлэри ыыттылар, ону тэҥэ сэминээрдэр, дьүүллэһиилэр буоллулар. Куорат эбийиэктэригэр, улахан тутууларыгар тиийэн, баар балаһыанньаны билистилэр.

Тыа хаһаайыстыбатын миниистирэ Александр Атласов, улуус баһылыга Николай Харбин, СӨ Судаарыстыбаннай мунньаҕын (Ил Түмэн) дьокутаата Николай Кульбертинов, тыа хаһаайыстыбатын управлениетын начаалынньыга Афанасий Антонов Үҥкүр сэлиэнньэтигэр бурдук хаһаайыстыбатыгар, «Поиск» кээпэрэтиипкэ, «Кладовая Олекмы» ХЭО пиэримэтигэр уонна Улахан Муҥкуга Максим Габышев бааһынай хаһаайыстыбатыгар сырыттылар.
Күнүс 4 чааска «Гармония» Култуура киинигэр ситэриилээх былаас отчуота саҕаланна. Саалаҕа «лыык» курдук элбэх киһи муһунна. Кинилэр ортолоругар оройуоннааҕы мунньах сэбиэтин дьокутааттара, тэрилтэлэр салайааччылара уонна биирдиилээн дьон бааллар. СӨ Өрөгөйүн ырыатын кэннэ сүрүн иһитиннэриини оробуочай бөлөх салайааччыта, СӨ тыатын хаһаайыстыбатын миниистирэ Александр Атласов оҥордо, Арассыыйаҕа Учуутал уонна Уһуйааччы, Саха Өрөспүүбүлүкэтигэр Үлэ сылларыгар хас биирдии киһи дойдубут сайдарыгар тус кылаатын киллэрсэн үлэлииригэр ыҥырда. Улуус бастыҥ үлэһиттэригэр, үрдүк көрдөрүүлээх тэрилтэлэр салайааччыларыгар СӨ бырабыыталыстыбатын Махтал суруктарын, наҕараадаларын туттарда.
Олохтоохтор элбэх ыйытыыны биэрэн, быһаарыллыбатах кыһалҕалары туруорсан, куорат уонна улуус бары эйгэтин боппуруостарын таарыйдылар.
Эбийиэктэри тутуу хаамыытын кэмиҥэр тутар хамыыһыйа ирдэбилэ уларыйа турара үлэ түмүктэнэрин атахтыырын; 2012 сылтан саҕалаан биэнсийэҕэ тахсар саас уһатыллыбытынан, биэнсийэҕэ тахсыах 5 сыл иннинэ өйөбүл төлөбүр оҥоһуллуон сөбүн; куораты халаан содулуттан харыстыыр быһыт өрөмүөннэнэр кэмэ кэлбитин; «Умнас» массыына суола ханнык учаастакка тиийбитин; куоракка саҥа тутуллубут оройуоннар суолларын бэйэлэрэ оҥордохторуна, ол ороскуота төннүөхтээҕин уо.д.а. туһунан санааларын атастастылар.
Куоракка 7 нүөмэрдээх коррекционнай уонна «Эврика» оскуолалар хаһан тутуллуохтарын туһунан ыйыттылар. Өлүөхүмэ куоратынан ааһар «Сила Сибири» сир баайын хостооччулар улууска бассейнаах, доруобуйаны чэбдигирдэр киини тутуохтарын сөбө ахтылынна. «Үгүс чааһынай тэрилтэҕэ сүрүннээн эр дьон үлэлииринэн, кинилэри быстах хомууртан босхолуурга туох эмэ дьаһал ылыллыан сөп дуо, онто да суох үлэһит илии тиийбэт», -– диэн ыйытан, СӨ Урбааҥҥа министиэристибэтиттэн хоруйу күүтэллэр.
Нэһилиэктэргэ сылдьан илэ хараххынан көрдөххө уонна олохтоохтор туруорсууларын иһиттэххэ, хомойуох иһин, улууска доруобуйа харыстабылын кыһалҕата олус элбэх. Биэлсэр-акушер пууннара суохтар, сорохторо өрөмүөннэрэ суох, штат баарын үрдүнэн, үлэлии кэлэр исписэлиис суох уо.д.а. СӨ доруобуйа харыстабылын миниистирин бастакы солбуйааччы Дмитрий Сергин 2020 сылтан улуустарга ананар исписэлиистэр ортолоругар биир да Өлүөхүмэттэн төрүттээх мэдиссиинискэй үөрэхтээх ыччат суоҕун, онон улууска идэни таларга сырдатар үлэ күүскэ барыахтааҕын туһунан эттэ. Хаҥалас улууһун оскуолаларыгар мэдиссиинискэй кылаастары арыйан, олус үчүгэй үгэһи олохтообуттарын холобурдаата.
Бүтүн улуус үйэлээх устуоруйатын кэпсиир, көрдөрөр кыраайы үөрэтэр мусуой дириэктэрэ Ирина Никифорова мусуой туспа дьиэтэ суох буолан, элбэх экспонат (14 тыһыынча 400 кэриҥэ экспонат баар) көрдөрүүгэ туруоруллар кыаҕа суоҕун, «Култуура» национальнай бырайыакка кыайан киирсибэттэрин туһунан эттэ.  Николай Харбин саҥа мусуойга анаан сир учаастага бэриллибитин, көрдүүр-чинчийэр үлэлэр ыытыллыбыттарын туһунан иһитиннэрдэ.
Ыйытыылар, этиилэр түмүктэммиттэрин кэнниттэн улуус баһылыга отчуоттуур бөлөххө араас салааттан сөптөөхтүк талыллан кэлбиттэригэр махтанна.
«Мусуой дьиэтин тутарга саҥа саҕахтар арыллаллар. Быһыты көрөргө-истэргэ төһө үп-харчы наадатын чопчу этиэхпит. Косогор уонна Мөтөгөр учаастактарыгар үлэ салҕаныаҕа. Онтон Солянка-Балаҕаннаах хайысханан суолу оҥоруу үлэтэ саҕаланыаҕа», —– диэн быһаарда.

Олохтоохтор ситэриилээх былаас үлэтин «үчүгэйинэн» сыаналаатылар. Бырабыыталыстыба нэһилиэнньэ кыһалҕатын балачча билэрин уонна быһаарарын бэлиэтээн туран, нэһилиэнньэҕэ куруук аһаҕас буоларыгар баҕардылар уонна Өлүөхүмэ сирин күүстээх эрчимин иҥэринэ элбэхтик кэлэллэригэр ыҥырдылар.

Ааптар түһэриилэрэ