Өлүөхүмэлэри ардах мэһэйдиир

Бу күннэргэ өрөспүүбүлүкэ оҕуруотчуттара, сирин үлэһиттэрэ күһүҥҥү хомуур үгэнигэр сылдьаллар.

Ол курдук, аһаҕас сиргэ үүннэриллэр оҕуруот аһын 13398 туоннаны хомуйдулар. Холобура, 6970 туонна хаппыыста, 2276 туонна моркуоп, 2135 туонна сүбүөкүлэ, 2015 туонна оҕуруот атын аһа күнү-дьылы баттаһа хомулунна.

Хаһаайыстыбаларга 71,8 тыһ. туонна хортуоппуйу хостуохтаахтар. Балаҕан ыйын 23 күнүнээҕи туругунан ыһыллыбыт иэнтэн 5822 гектартан ороон, куулга куттулар. 71900 туонна хостонуохтааҕыттан 55929 т. ороотулар.

Ол эрээри үгүс хаһаайыстыбалары кэлэ-кэлэ түһэ турар ардахтар мэһэйдииллэр. Холобура, Өлүөхүмэ  оҕуруотчуттарын.

—  Улахан хаһаайыстыбабыт “Саҥыйахтаах” ТХПК хортуопуй хомуурун ардахтан сылтаан тохтотон баран, бүгүҥҥүттэн эмиэ бааһыналарыгар комбайнынан үлэлии сылдьаллар.  Билигин өссө үс бааһынай хаһаайыстыба үүнүүтүн  хомуйан бүтэрээри дьулуһар. Хортуоппуйу “Романов” ИП соҕотуопкалыыр, киниэхэ туттараллар. Ардахтан сылтаан  эмиэ бурдук быһааччылар тардылыннылар, — диир Өлүөхүмэ улууһун тыа хаһаайыстыбатын управлениетын начаалынньыга Афанасий Антонов.

Хаартыска: А.Антонов тиксэрдэ.