Өлүөхүмэтээҕи оҕо ускуустубатын оскуолата муусука үстүрүмүөнүнэн, тэрилинэн хааччылынна

Өлүөхүмэтээҕи оҕо ускуустубатын оскуолата быйылгы үөрэх дьылыгар хаһааҥҥытааҕар даҕаны харыс үрдээн сылдьар. “Култуура” национальнай бырайыак иитинэн оскуола муусука үстүрүмүөнүнэн, анал ирдэнэр тэрилинэн хааччылынна.  

Оскуола дириэктэрэ Екатерина Павлова иһитиннэрбитинэн, айар дьоҕурдаах оҕолор кыһаларыгар 4 007759,52 солк. суумалаах муусука үстүрүмүөнүн уонна анал тэрили ылбыттар. Ол курдук, инструментальнай толоруу кылааһыгар Соната роялы, Kurzweil цифровой пианинолары, баяннары, гитаралары, балалайкалары, домралары, контрабас аҕалбыттар. Оскуола бибилэтиэкэтэ нотнай уонна мэтэдиичэскэй матырыйаалынан, теоретическай дьарыкка аналлаах муусука босуобуйатынан хаҥатыллыбыт.

Онтон ойуулуур-дьүһүннүүр ускуустуба кылаастарыгар натюрмот, скульптура остуоллара, софит уонна көрдөрөр былакааттар кэчигирэспиттэр.

Хоровой станок уонна проектордаах интерактивнай дуоска бөлөҕүнэн дьарыктары уонна теоретическай уруоктары ыытарга көмөлөөхтөр диэн ыйар.

“Саҥа үстүрүмүөннэр үөрэх хаачыстыбатыгар, оҕо дьарыктанар баҕата уһуктарыгар, айар дьоҕура үрдүүрүгэр, түмүк көрдөрүүгэ үтүө эрэ өттүнэн сабыдыаллыыра саарбахтаммат. Бырайыак көмөтүнэн 1 Нөөрүктээйитээҕи филиалбыт үөрэнэр миэбэлинэн олоччу хааччыллыбытын бэлиэтиир оруннаах”, — диэн дириэктэр Екатерина Павлова этэр.

Итини таһынан, “Цифровой култуура” бырайыагынан 1 100000 солк. суумалаах виртуальнай кэнсиэртиир саала тэрилин (медиасервер, лазернай проектор, моторизированнай экран, микшернай пульт, акустическай система, сабвуфер) ылан таҥмыттар.

“Бүтүн Арассыыйатааҕы кэнсиэртиир саала – киэҥ далааһыннаах бырайыак. Бу саала көмөтүнэн оҕолор эрэ буолбакка, куораппыт, улууспут олохтоохторо классическай муусуканы сэҥээриилэрэ үрдүөҕэ, дойду култуураҕа-муусукаҕа эйгэтин биир ситимигэр кыттыһар уонна Арассыыйа биллэр-көстөр кэлэктииптэрин, солистарын кэнсиэрин онлайн уонна уһуллубутун истэр кыахтаныахтара”, — диэн Екатерина Борисовна санаатын үллэстэр.

Саала аһыллыытын сэтинньи 10 күнүгэр былаанныллар. Дьоро күҥҥэ Култуура уонна духуобунай сайдыы министиэристибэтиттэн, Саха сирин филармониятыттан миниистир, салайааччылар, артыыстар кэлэллэрин күүтэллэр.

Манна даҕатан эттэххэ, тустаах оскуола иитиллээччилэрэ өрөспүүбүлүкэ, дойду таһымнаах куонкурустарга, тэрээһиннэргэ тиһигин быспакка кытталлар, миэстэлэһэллэр. Олохторун ускуустуба кэрэ эйгэтин кытта ситимниир түгэннэрэ үгүс. Ол курдук, кэлиҥҥи биэс сылга Өлүөхүмэтээҕи ускуустуба оскуолатын бүтэрбиттэртэн 13 оҕо Санкт-Петербург, Калининград, Иркутскай, Казань, Дьокуускай, Нам үрдүк, орто үөрэхтэрин кыһаларыгар ойуулуур-дьүһүннүүр ускуустуба (живопись, дизайн архитектура), хореография салааларыгар үөрэххэ киирбиттэр. Күн бүгүн 11 преподаватель уонна биир программист тустаах оскуоланы бүтэрэн, талан ылбыт идэлэрин баһылаан, үөрэммит оскуолаларыгар айымньылаахтык үлэлии сылдьаллар.